 Дзьмітрый Мядзьведзеў |
Сёньня ў Крамлі ён прысягнуў народу Расеі.
Трэцяму расейскаму прэзыдэнту 42 гады. Ён стаў самым маладым кіраўніком дзяржавы за апошнія 100 гадоў.
Пасьля прыняцьця прысягі Дзьмітрыем Мядзьведзевым Уладзімер Пуцін, які 8 гадоў кіраваў краінай, аўтаматычна перастаў выконваць абавязкі кіраўніка дзяржавы.
У сваёй інаўгурацыйнай прамове Дзьмітрый Мядзьведзеў заявіў:
«Лічу сваёй найважнейшай задачай далейшае разьвіцьцё грамадзянскіх і эканамічных свабод, стварэньне новых, самых шырокіх магчымасьцяў для самарэалізацыі грамадзян, грамадзян свабодных і адказных як за свой асабісты посьпех, так і за росквіт усёй краіны».
У сваёй прамове Мядзьведзеў зрабіў акцэнт на важнасьці ўмацаваньня прававой дзяржавы: «Мы мусім дабіцца сапраўднае павагі да закону і пераадолець прававы нігілізм».
Мядзьведзеў таксама падзячыў Пуціну за падтрымку і сказаў, што разьлічвае на яе й надалей:
«Я добра ўсьведамляю, які груз адказнасьці кладзецца на мае плечы, і разьлічваю на нашу супольную працу».
Між тым на Захадзе новую структуру ўлады ў Расеі назвалі «тандэмакратыяй», бо дагэтуль незразумела, як Дзьмітрый Мядзьведзеў і Ўладзімер Пуцін падзеляць міжсобку ўладныя паўнамоцтвы. Многія разглядаюць Мядзьведзева, які быў досыць безаблічным чыноўнікам і ніколі не займаў выбарных пасадаў, як марыянэтку Пуціна.
