10.05.2016 / 10:07

У сябра Пуціна Ралдугіна знайшоўся яшчэ адзін афшор 9

У файлах «Панамскага архіва» змяшчаецца інфармацыя аб афшорных фірмах, якія належаць людзям з акружэння прэзідэнта Расіі Уладзіміра Пуціна.

Як інфармуе Slon.ru, пра гэта сведчаць дадзеныя, апублікаваныя Міжнародным кансорцыумам журналістаў-следчых (ICIJ).

У архіве ўтрымліваецца інфармацыя аб некалькіх кампаніях, зарэгістраваных на сябра расейскага лідара, віяланчэліста Сяргея Ралдугіна, у прыватнасці, Raytar Limited (Брытанскія Віргінскія выспы), пра якую раней не было вядома.

Таксама былі апублікаваныя дадзеныя аб зарэгістраваных на Брытанскіх Віргінскіх выспах фірмах, якія належаць бізнэсменам Ратэнбергам. За Барысам Ратэнбергам замацавана Kenrick Overseas Ltd., Culloden Properties Limited і Highland Ventures Group Limited. На імя Аркадзя Ратэнберга зарэгістраваныя кампаніі Breckenridge Global Management Limited, Beechwood Associates Inc. і Causeway Consulting Limited. Сыну Аркадзя Ратэнберга Ігару належыць фірма Stormont Systems Limited.

На імя кіраўніка дэпартамента транспарту Масквы Максіма Ліксутова, згодна з архівам, зарэгістраваная фірма Sermolent Equities Inc. Юрысдыкцыя кампаніі не ўдакладняецца. Раней у дэпартаменце заяўлялі, што інфармацыя ў «Панамскім архіве» не адпавядае рэчаіснасці і намеснік мэра Масквы не з'яўляецца бенефіцыярам афшорных кампаній. Згодна з дэкларацыяй Ліксутова, за 2015 год ён зарабіў 65,9 мільёнаў рублёў.

У той жа час у базе дадзеных «Панамскага архіва» няма інфармацыі аб фірме фігурысткі Таццяны Наўка, жонкі прэс-сакратара Пуціна Дзмітрыя Пяскова. Раней са спасылкай на дакументы, апублікаваныя ICIJ, паведамлялася, што на спартсменку зарэгістраваная афшорнай кампанія Carina Global Assets Ltd., якая таксама знаходзіцца ў юрысдыкцыі Брытанскіх Віргінскіх выспаў. Пасля выхаду публікацыі Пяскоў раскрыў маёмасць жонкі ў дэкларацыі і абверг дадзеныя СМІ, адзначыўшы, што гэта ставіць пад сумнеў дакладнасць усёй інфармацыі ICIJ.

Сяргей Ралдугін сапраўды займаецца прадпрымальніцтвам, паведамляў Пуцін, але зарабляе невялікія грошы, на якія купляе музычныя інструменты для музычных устаноў Расіі. У Крамлі падкрэслівалі, што ўсе аперацыі фірмаў музыканта законныя, і заклікалі журналістаў паважаць яго прыватнае жыццё. Пазней СМІ прыйшлі да высновы, што кампанія Ралдугіна International Media Overseas S.A. атрымала сродкі за продаж акцый «Роснефті», прапажу якіх выявіў юрыст Hermitage Capital Сяргей Магніцкі.

Дакументы «Панамскага архіва» належаць Панамскай юрыдычнай кампаніі Mossack Fonseca. Крыніца, якая раскрыла інфармацыю аб працы фірмы, раней заявіла, што хацела пакараць кампаніі, якія свядома парушаюць закон. У пачатку красавіка, у рамках расследаванняў, заснаваных на апублікаванай інфармацыі, журналісты распавялі аб кампаніях, якія належаць членам сем'яў сусветных лідараў.

0
Беларус / Адказаць
10.05.2016 / 10:44
Ролдугин, береги виолончель!!!
0
Ax / Адказаць
10.05.2016 / 11:18
Як cтaлa цiкaвa
0
Афшор / Адказаць
10.05.2016 / 11:45
Мужык,купi Royal (спирт) !
Паказаць усе каментары/ 9 /
Каб пакінуць каментар, калі ласка, актывуйце JavaScript у наладах свайго браўзеру