 |
Міжнародная арганізацыя «Рэпарцёры бязь межаў» сёньня выступіла з асуджэньнем уціску недзяржаўнага штотыднёвіка «Газета Слонімская» — адзінай недзяржаўнай газэты ў гарадзенскім рэгіёне.
«Мы зноў выказваем занепакоенасьць наступам на нешматлікія незалежныя мэдыі ў Беларусі», — гаворыцца ў заяве «Рэпарцёраў». «Улады робяць усё магчымае, каб перашкодзіць ім працаваць у апошнія месяцы перад парлямэнцкімі выбарамі», — лічыць арганізацыя.
«Рэпарцёры» нагадваюць, што да 1 чэрвеня 2008 году газэту змушаюць пакінуць займанае памяшканьне, рэдакцыі пагражае скасаваньне ліцэнзіі на раздробны гандаль, а галоўнага рэдактара Віктара Валадашчука якраз у напружаны для рэдакцыі час забіраюць на вайсковыя зборы.
«Адміністратыўны ўціск, уключаючы неапраўданае прымяненьне некаторых норм заканадаўства, зьяўляецца ўлюбёным спосабам уладаў змусіць замаўчаць незалежную прэсу ў Беларусі», — рэзюмуюць «Рэпарцёры бязь межаў».
