Тарыфы на чыгуначныя перавозкі для пасажыраў у Беларусі застаюцца ранейшымі, але фарміруюцца па новых правілах. Гэта вынікае з каментарыя Міністэрства эканомікі да пастановы ведамства ад 6 красавіка 2016 года № 16, якое апублікавана 14 мая на Нацыянальным прававым інтэрнэт-партале, а набудзе моц праз 10 дзён.
Як растлумачылі ў Мінэканомікі, цяпер у кошт праезду на рэгіянальных лініях бізнес-класа, міжрэгіянальных лініях эканом-і бізнес-класа, а таксама кошт правозу багажу на гарадскіх, рэгіянальных і міжрэгіянальных лініях уключаны ПДВ у памеры 20%.
Згодна з пастановай, узровень дзеючых тарыфаў на перавозкі пасажыраў на лініях, якія з 1 сакавіка 2016 года абкладаюцца ПДВ, застаўся нязменным, а на лініях, якія абкладаліся ПДВ і раней, тарыфы механічна павялічаныя на суму ПДВ (20%), што спаганяецца.
Пры гэтым у пастанове ўдакладняецца, што тарыфы на перавозкі пасажыраў чыгуначным транспартам агульнага карыстання на гарадскіх, рэгіянальных і міжрэгіянальных лініях устаноўленыя з улікам падатку на даданую вартасць згодна з заканадаўствам. Гэта значыць, калі раней ПДВ спаганяўся пры куплі білета, то цяпер ў пастанове паказаная канчатковая цана з улікам ПДВ.
«Такім чынам, прыняцце пастановы Мінэканомікі не прывядзе да павышэння дзеючых тарыфаў на праезд і канчатковы кошт паслуг па перавозцы пасажыраў чыгуначным транспартам на гарадскіх, рэгіянальных і міжрэгіянальных лініях для насельніцтва не зменіцца», — падкрэсліваецца ў каментарыі Мінэканомікі.
Дзеючыя тарыфы на перавозкі пасажыраў чыгуначным транспартам ўстаноўлены пастановай Міністэрства эканомікі ад 14 снежня 2015 года № 70 — тады яны былі павялічаныя ў сярэднім на 33%.
