У Слоніме апублікаваны дакумэнт за подпісам начальніка раённага КДБ Аляксандра Мазалькова, адрасаваны загадчыку псыханэўралягічнага аддзяленьня раённай бальніцы. Невядомыя перадалі яго рэдактару «Газеты Слонімскай».

Віктар Валадашчук апублікаваў сёньня на сайце «Газеты Слонімскай» дакумэнт за подпісам начальніка раённага КДБ Аляксандра Мазалькова, адрасаваны загадчыку псыханэўралягічнага аддзяленьня раённай бальніцы.

В. Валадашчук знайшоў канвэрт у сваёй паштовай скрыні. У ёй — афіцыйны дакумэнт з выходнымі зьвесткамі й подпісам начальніка міжраённага аддзелу ўпраўленьня КДБ па Гарадзенскай вобласьці.

Гэты дакумэнт разьмешчаны на сайце. Праўда, сьпіс жыхароў, акрамя сваіх родных, Віктар Валадашчук закрэсьліў: «Я не хачу называць прозьвішчы ўсіх людзей, бо ня ўсе з гэтым змогуць пагадзіцца. Але скажу, што там прозьвішчы тых, хто ў нас актыўна займаецца грамадзка-палітычнай дзейнасьцю», — кажа ён.

У адкрытым лісьце В. Валадашчук выказвае зьдзіўленьне тым фактам, што КДБ цікавіцца псыхічным здароўем ягоных блізкіх, і патрабуе, каб начальнік раённага КДБ патлумачыў яму прычыну.

На сайце таксама зьмешчана позва з ваенкамату, згодна зь якой Віктар Валадашчук павінен 12 траўня зьявіцца туды. Яшчэ — блянк заявы на імя ваенкома, у якім ваеннаабавязаны дае згоду на правядзеньне КДБ праверачных мерапрыемстваў у адносінах да яго, а таксама на часовае абмежаваньне ў сувязі з гэтым права на недатыкальнасьць асабістага жыцьця.

Хочаш падзяліцца важнай інфармацыяй ананімна і канфідэнцыйна?