У Мінску з візітам знаходзяцца прадстаўнікі Дзяржаўнага Дэпартаменту ЗША Брыджыт Брынк і і Роберт Бяршчынскі.
Брыджыт Брынк і часовы павераны ў справах ЗША Скот Роланд. Фота амерыканскай амбасады
Сёння Брынк, якая займае пасаду намесніка кіраўніка Дзярждэпа па справах Еўропы і Еўразіі, сустрэлася з журналістамі.
Яна сказала, што напярэдадні ўжо мела сустрэчу з Макеем, Ярмошынай і прадстаўнікамі апазіцыі.
Брынк была вельмі сціплай у сваіх ацэнках і словах. Сказала толькі, што ўлады Беларусі адкрытыя да дыялогу.
Тут маецца на ўвазе пытанне правоў чалавека і празрыстасці выбараў.
«Мы вельмі задаволены словамі кіраўніка ЦВК пра тое, што на маючых адбыцца парламенцкіх выбарах будуць рэалізаваныя некаторыя рэкамендацыі АБСЕ», — сказала Брынк.
Таксама прадстаўніца Дзярждэпа дадала, што лёс прыпыненых санкцый у дачыненні да Беларусі пакуль невядомы.
«Ці здымуць іх канчаткова, залежыць ад вынікаў парламенцкай кампаніі», — падкрэсліла Брынк.
Пры гэтым, паводле яе, галоўнае — не пэўныя людзі ў парламенце, а празрыстасць працэсу.