10.05.2008 / 10:44

Беларусь – Расея – 3:4 7

Нацыянальная зборная Беларусі па хакеі ўчора на чэмпіянаце сьвету ў канадзкім Квэбэку правяла адзін з найбольш драматычных матчаў.


Нацыянальная зборная Беларусі па хакеі ўчора на чэмпіянаце сьвету ў канадзкім Квэбэку правяла адзін з найбольш драматычных матчаў з камандай Расеі.

Ужо пасьля першага пэрыяду нашы хлопцы нечакана выйгравалі 2:0, дзякуючы шайбам Міхалёва і Дудзіка. Разам з тым, расейцы няспынна атакавалі нашу браму, але кураж злавіў Віталь Коваль. Самая праблемная пазыцыя нашай каманды, як думалася перад чэмпіянатам, ўчора аказалася ці не найбольш трывалай. Коваль выратоўваў у некалькіх абсалютна фантастычных сытуацыях.

Стрымліваць увесь матч моцны расейскі рухавік было вельмі цяжка. Яшчэ ў другім пэрыядзе Максім Афінагенаў адыграў адну шайбу, а ў трэцім – Авечкін і той самы Афінагенаў вывелі Расею наперад – 3:2. У момант, калі ў нашу браму закідвалася трэцяя шайба, тэлекамэры выхапілі Курта Фрэйзэра, які схапіўся за галаву. Здаецца, што нават трэнэр ня верыў, што ягоная каманда зможа адыграцца. Але за дзьве з паловай хвіліны да фінальнай сырэны Аляксей Угараў выраўняў лік.

У овэртайме шанцы на перамогу былі і ў тых, і ў тых. Напрыканцы дадатковага часу зусім не абавязковае выдаленьне атрымаў Андрэй Касьціцын, але ўсё адно вытрымалі.

Пачалася сэрыя булітаў – хакейная лятарэя. Пэўна, Віталь Коваль вычарпаў ліміт фартуны яшчэ ў асноўны час. Ён так і ня ўзяў буліты Мазякіна і Марозава. У нас забіць змог толькі Мялешка, а вось Сяргей Касьціцын і Ўгараў расейскага брамніка Бірукова не перайгралі – 3:4.

Паражэньне ад расейцаў яшчэ пакінула беларусам прывідныя шанцы на трапляньне ў чвэрцьфінал. Для гэтага трэба сёньня перамагаць чэхаў, а праз два дні датчан.

Хочаш падзяліцца важнай інфармацыяй ананімна і канфідэнцыйна?

Зьміцер Панкавец

0
Заўзятар / Адказаць
10.05.2008 / 11:03
На сайце НН пратрындзелі мазгі братамі Касьціцынымі. Учора паглядзеў іхную гульню. Менавіта братаны і завалілі сустрэчу з маскавітамі. У нас усе наяўныя сродкі кінутыя на хакей. У выніку зьнішчана беларуская школа фехтаваньня, накрылася жалезным блінам цяжкая атлетыка, загавела душой спартовая гімнастыка, на пусты канец сышоў біятлён. І што маем у выніку? Адно ачко на ЧС. Ці не замала?
0
bL8dy_R8ts / Адказаць
10.05.2008 / 11:49
Я лічу вінаваты трэнер. Ён мусіць у адстаўка падаваць. Гэта - не гульня. Бачна ж , што гуляць хлопцы могуць. Чаму ж не перамагаюць?
0
Саянаў / Адказаць
10.05.2008 / 11:55
Я таксама бачу гульню Касьціцыных слабай. Але таму ёсьць нагоды,якія павінны былі быць улічаны коўчэм. Чаго не адбылося. Пагадзіцеся,што самую ўдалую гульню нашы прадэманстравалі ў адзінаборстве з швэдамі. Бяз НХЭлаўцаў. Чаму? Бо каманда нагульвалася загадзя. Адбылася пэўная "прыцірка" гульцоў,прызвычаенасьць. Пасьля,як дадаліся ЭНХээлаўцы,вынікі падрыхтоўкі пайшлі пылам,бо яна адбывалася бязь іх. І камандзе прыйшлося "на хаду" перапрыстасоўвацца да "новых" парінэраў, а "новым" партнэрам да каманды непасрэдна ў самы адказны момант. Адсюль і шмат памылак на "роўным" мейсцы і добра бачная нязгуленасьць Касьціцыных. Яны шмат і хутка бегаюць, і гэта пакуль усё,што ў іх атрымліваецца. Гэта ня сьведчыць,што яны слабыя,гэта сьведчыць аб слабым разуменьні моманту Фрэйзерам. Такія "уліваньні" новых гульцоў далёка не заўсёды йдуць роўна(Фёдараў,Авечкін) нават у камандах, дзе ўсе астатнія гульцы таксама аднолькава высокага клясу,чаго ў беларускай камандзе нажаль няма ўвогуле. І яшчэ адна заўвага. Кідаецца ў вочы слабая гульня ў "цела". Апанэнт можа вольна сябе адчуваць у зоне абароны беларусаў,валодаючы шайбай. Ніхто яму не замінае,ня робіць папытак перашкодзіць прыцэльна кінуць. Як тое было з Авечкіным,які праехаў паўпляцоўкі бліз беларускай брамкі,меў час падрыхтаваць кідок і трапна, бесперашкодна, кінуў. Тое самае й з трэцім голам. Брамнік згуляў добра,але ніхто не пажадаў перашкодзіць "дарабіць" справу маскоўцу дадатковым кідком. Тое самае было й у гульні з Швайцарыяй. Цалкам праіграны "борт". Швайцары нават займелі магчымасьць ужаваць прэсынг ужо ў самым пачатку беларускай атакі й на беларускай палове пляцоўкі.
Паказаць усе каментары/ 7 /
Каб пакінуць каментар, калі ласка, актывуйце JavaScript у наладах свайго браўзеру