1. Фільм будзе ісці ў беларускай агучцы. Сур’ёзна, калі апошні раз вы хадзілі на фільм па-беларуску ў кінатэатры? Гэта амаль як ўбачыць аднарога.
Апошняя такая магчымасць была шмат год таму.
2. Фільм зняты паводле еўрапейскага бэстэлера.
Кніга «Васьмікласнікі не плачуць», напісаная галандскім настаўнікам Якубам Врынсам, разыйшлася накладам каля 3 мільёнаў асобнікаў і зрабілася адной з самых паспяховым кніг у Бенілюксе. Дарэчы, аўтар кнігі зняўся ў фільме ў эпізадычнай ролі.
3. У пракаце бывае няшмат фільмаў, якія ўключаюць наш мозг.
Гэты фільм з такіх, ён дае ежу для роздумаў. Роздумаў пра рак, пра стаўленне да асаблівых людзей, пра пытанні жыцця і смерці, нарэшце. Акрамя самога фільма, ў пачатку будзе выступ лекара-анколага, заведуючай аддзялення дзіцячага хоспіса.
4. Кіно распавядае аб складаных рэчах простай мовай.
Гэта — сямейны фільм. І адпаведна, ён зроблены так, каб яго маглі зразумець і прыняць як дзеткі, так і дарослыя. Таму вы можаце прыходзіць на гэты добры і сумны фільм усёй сям’ёй.
5. І яшчэ раз пра мову. Прагляд гэтага фільма — цудоўная магчымасць падтрымаць родную мову.
Напрыклад, пасля прагляду можна пакінуць падзяку за беларускасць ў кнізе падзякаў кінатэатра. Ці напісаць ухвальныя каментары ў інтэрнэце. Такія дзеянні пакажуць, што беларуская мова — запатрабаваная. А за гэтым сочаць, паверце. І, магчыма, неўзабаве гэта прывядзе да пашырэння выкарыстання роднай мовы ў кінатэатрах і не толькі!
