Паводле непацверджанай інфармацыі, ён скончыў жыццё самагубствам. Як падзялілася з карэспандэнтам «Салiдарнасцi» яго сяброўка Аксана Сідорская, дачка экс-прэм'ера Беларусі, пахаванне Дзягцярыка адбудуцца ў чацвер.
Як стала вядома «Салiдарнасцi», вядомы бізнэсмэн і, як рэгулярна яго характарызавалі свецкія хранікёры, — яркі персанаж у тусоўках Мінска Яўген Дзягцярык пакончыў з сабой 24 траўня. Што паслужыла прычынай суіцыду, пакуль невядома.
— Я не магу сказаць дакладна, што адбылося — над гэтым працуюць следчыя органы. Але так, Яўгена больш няма. Гэта адбылося ўчора, — распавяла ў сераду «Салiдарнасцi» сяброўка бізнэсмена Аксана Сідорская, дачка экс-прэм'ера Беларусі Сяргея Сідорскага. — У нядзелю ён адзначаў дзень нараджэння, быў у добрым настроі, прымаў віншаванні дома, у горадзе… Мы ўсе ў шоку ад таго, што адбылося. Гэта не падобна на яго. Але, значыць, такім было яго рашэнне.
Як паведаміла суразмоўца, пахаванне Яўгена Дзягцярык адбудзецца ў чацвер.
Жонка бізнэсмена Настасся Лагода з'яўляецца ўласніцай сеткі мультыбрэндавых буцікаў «Кабукi». Па адным з нумароў тэлефонаў магазінаў «Салiдарнасцi» адказалі, што не могуць дапамагчы звязацца з кіраўніцтвам у сувязі з трагічнымі падзеямі. Ад каментароў на іншым канцы провада там устрымаліся.
У Следчым камітэце высветліць падрабязнасці трагедыі пакуль не ўдалося.
* * *
Яўген Дзягцярык, акрамя «Кабукi», таксама быў вядомы як уладальнік сталічнага кафэ «Базілік». Ён пачынаў кар'еру токарам на заводзе, затым некалькі гадоў прапрацаваў адміністратарам у філармоніі і арганізатарам канцэртных праграм. Бізнесам заняўся «для душы», адкрыўшы невялікае кафэ. Захапляўся тэнісам.
— Мы проста атрымліваем задавальненне ад таго, што яно корміць людзей і прыносіць невялікі прыбытак, — распавядаў бізнэсмен некалькі гадоў таму ў інтэрв'ю часопісу «Алё, МТС».
Таксама прадпрымальнік згадваў пра тое, што людзі «ідуць у бізнэс» ад безнадзейнасці.
— Калі б мне, як токару, плацілі дастаткова для нармальнага існавання, застаўся б на заводзе. Выйшаў з працы і забыўся, што там адбылося. Рукі адмыў — усё ў цябе добра ў жыцці, і не трэба думаць пра заўтрашні дзень. У бізнэсе так не бывае.
…Чалавек, які займаецца бізнэсам, у яго не бывае выходных, і галава ніколі не адключаецца. Ён увесь час знаходзіцца ў стане напружання, таму што бізнэс — гэта тое, ад чаго залежыць яго жыццё, яго дабрабыт і наогул усё. Любы чалавек, які сур'ёзна займаецца бізнэсам, расслабляецца вельмі рэдка…
…Кожны лічыць, што крызіс на ім адбіўся больш, чым на іншых. Пытанне ў тым, якая за гэтым будзе рэакцыя. Адзін вядомы палітык сказаў, што крызіс дазволіць нам ацаніць свае магчымасці. І ён мае рацыю. У стрэсавай сітуацыі чалавек здзяйсняе альбо правільныя, альбо няправільныя ўчынкі. А потым ацэньвае вынік сваіх дзеянняў, вядома, калі ён чалавек разумны. Зараз прыйшоў час рабіць учынкі, праявіць усё сваё майстэрства па выжыванні ў хуткаплынным асяроддзі, а наколькі дасканала кожны валодае гэтым майстэрствам — пакажа час.
