09.06.2016 / 08:21

Былы міністр прадаў свой катэдж у Драздах са зніжкай $1 мільён 14

У апошнія тыдні з сайтаў агенцтваў нерухомасці знікла аб’ява аб продажу катэджа ў Драздах на завулку Ціхім. Гэтым домам плошчай 267 м2 валодала сям’я былога міністра юстыцыі Віктара Галаванава. Цяпер ён працуе рэктарам у Беларускім інстытуце правазнаўства.

Віктар Галаванаў, фота Антона Матолькі.

Мы ўжо пісалі пра спробу Галаванавых абнаявіць «бонус», атрыманы ад дзяржавы ў 2000-я.

Сын міністра (дарэчы, выкладчык у бацькавым універсітэце) у свой час атрымаў катэдж у падарунак ад бацькі, а пасля выставіў яго на продаж за $1,4 мільёна.

Фота Сяргея Гудзіліна.

На фоне крызісу цана выглядала неадэкватнай рынкавым рэаліям. Гаспадарам даводзілася раз за разам зніжаць цану.

І вось цяпер, як стала вядома «Нашай Ніве», Галаванавы ўсё ж змаглі знайсці купца. Угода была зарэгістраваная ў канцы мая 2016 года.

Колькі ўдалося атрымаць сям’і былога міністра? У дамове запісана 8 мільярдаў 235 мільёнаў 360 тысяч беларускіх рублёў. Па тагачасным курсе гэта роўна $420 тысяч. Атрымалася каля $1570 за квадратны метр.

Такім чынам, зніжка ў параўнанні з першаснай прапановай склала каля $1 мільёна.

Аднак нават у такім разе кошт дома сям’і былога чыноўніка адпавядае сярэдняму заробку «чыстымі», атрыманым беларусам за 115 гадоў.

Купіла дом 62-гадовая жыхарка Мінска. Яна непублічны чалавек, яе прозвішча нідзе раней не фігуравала.

Апроч дома, ёй дасталіся 9,94 соткі элітнай зямлі. Праўда, уласнікам надзела фармальна лічыцца Рэспубліка Беларусь.

Рэч у тым, што чыноўнікам накшталт Галаванава, якія не трапілі ў першы «драздоўскі прызыў» (там былі Віктар Шэйман, Міхаіл Мясніковіч і дзясяткі іншых), зямля выдзялялася не ва ўласнасць, а па праве пажыццёвага спадчыннага валодання.

Прадаўшы дом у Драздах, Галаванаў на вуліцы не застанецца. Яшчэ з 1990-х у яго ёсць прасторная трохпакаёўка ў «чырвоным доме» на вуліцы Максіма Танка.

* * *

Як выглядаў дом Галаванавых?

Госці Галаванавых трапляюць у прасторны хол (30 м2). Адтуль разыходзяцца дзверы ў гасціную (39 м2), жылы пакой (22 м2) і гараж (32 м2). Таксама ўнізе знаходзяцца кухня (20 м2), гардэробная (8 м2), санвузел і топачная. Праз шкляныя дзверы можна выйсці ў двор з двух бакоў дома.

Калі ўзняцца па драўлянай лесвіцы на мансардны паверх, апынешся ў чарговым холе (40 м2). Вакол яго тры жылыя пакоі (каля 20 м2 кожны), яшчэ адна гардэробная і яшчэ два санвузлы.

Інтэр’еры выглядаюць простымі. На сценах развешаныя карціны і нейкія граматы. Над працоўным сталом — дартс.

Від з балкона таксама не ўражвае, суседнія катэджы стаяць ушчыльную. Затое можна вітацца са старшынёй ЦВК Лідзіяй Ярмошынай, якая жыве насупраць.

Віктар Галаванаў нарадзіўся ў 1952 у Барысаве. Скончыў юрыдычны факультэт БДУ (1979), Інстытут паліталогіі і сацыяльнага кіравання КПБ (1991). Кандыдат юрыдычных навук.

У 1980—1987 быў на партыйнай працы, у 1987—1988 — кіраўнік аддзела юстыцыі Магілёўскага аблвыканкама. У 1988—1992 — інструктар дзяржаўна-прававога аддзела ЦК КПБ, начальнік аддзела, намеснік начальніка ўпраўлення Міністэрства юстыцыі Беларусі. У 1992—1995 — намеснік старшыні Дзяржаўнага патэнтнага ведамства. У 1995—1996 — член Мінскай гарадской калегіі адвакатаў.

У 1996—2000 — намеснік, першы намеснік міністра юстыцыі. У 2000—2001 — начальнік Галоўнага дзяржаўна-прававога ўпраўлення Адміністрацыі прэзідэнта. У 2001—2011 — міністр юстыцыі. 

Цяпер — рэктар Беларускага інстытута правазнаўства.

Жанаты. Мае дваіх дзяцей.

Ягор Марціновіч

0
Тургенеў з-пад Барысава / Адказаць
09.06.2016 / 08:28
Працуюць людзі, у поце твару))) Але ж дызайн інтэр'ераў... як у ДК дзесьці ў Шклове 1970-х.
0
LMI / Адказаць
09.06.2016 / 08:36
Гэй - таварыш Давыдзька, адкуль у экс-міністра, а зараз рэктара, такія грошы на будоўлю былі (больш мільена ў валюце) ? Адкуль ? Ен жа не нейкі там "сантэхнік", ці проста "нармальны чалавек". Так адкуль ? І гэта не пытаньне аб зайздрасьці, гэта пытаньне аб сумленнасьці пэўных істот, якія калі ўлады круцяцца ды й грошы не заробленыя шпурляюць направа і налева ў той час як астатнія павінны быць давольны заробкам у 2 мільена (ці колькі там Качанава прапанавала на "заможнае жыцьце"). Так што не крыўдуце, таварыш Давыдзька, а паспрабуйце прынамсі маўчаць калі тое патрэбна
0
Джон Жарптушкін / Адказаць
09.06.2016 / 08:40
Чырвоная прахвэсура рабуе беларускі народ.
Паказаць усе каментары/ 14 /
Каб пакінуць каментар, калі ласка, актывуйце JavaScript у наладах свайго браўзеру