Следчыя органы завяршылі расследаванне справы 39-гадовага жыхара Бабруйска, які абвінавачваецца ў забойстве жанчыны і яе дзіцяці ў Глускім раёне.
Нагадаем, трупы жанчыны і яе сына былі выяўленыя 26 снежня 2015 года ў адным з дамоў у вёсцы Заполле Глускага раёна. Смерць абодвух наступіла ад шматлікіх колата-рэзаных і агнястрэльных раненняў. Дом, дзе былі знойдзеныя забітыя, выкарыстоўваўся як дача і належаў знаёмаму жанчыны, які быў западозраны ў злачынстве. Ён знаходзіўся на месцы трагедыі ў стане моцнага алкагольнага ап'янення.
Следства выявіла, што падчас сваркі з 28-гадовай бабруйчанкай, якая гасцявала ў яго разам з сямігадовым сынам, абвінавачаны нанёс пацярпелай нажом, рукамі і нагамі, а таксама прыкладам паляўнічай стрэльбы мноства удараў па розных частках цела. Дзіцяці быў нанесены адзін удар нажом у грудную клетку. Акрамя таго, абвінавачаны, паводле версіі следства, стрэліў у хлопчыка з паляўнічай стрэльбы. Маці і сын памерлі на месцы.
«Пасля забойстваў абвінавачаны выйшаў на вуліцу, дзе беспадстаўна, з хуліганскіх меркаванняў, стаў страляць па вокнах суседняга дома, ствараючы пагрозу жыцця і здароўя ўласніку жылля, прыкладам стрэльбы разбіў шыбы ў доме, а затым збіў пацярпелага, які выйшаў на шум і спрабаваў адабраць у яго зброю», — паведаміла БелаПАН афіцыйны прадстаўнік УСК па Магілёўскай вобласці Аксана Салянюк.
Паводле яе слоў, згодна з высновамі псіхолага-псіхіятрычнай экспертызы, на момант учынення злачынстваў абвінавачаны псіхічных расстройстваў не меў, мог у поўнай ступені ўсведамляць характар сваіх дзеянняў і кіраваць імі.
Бабруйчаніну пагражае смяротнае пакаранне. Пракуратура накіравала справу ў Магілёўскі абласны суд, паведаміў БелаПАН намеснік начальніка аддзела абласнога нагляднага ведамства Дзмітрый Шарамет.
