Расія не трымае зла на ЕС за тыя дзеянні, якія прывялі да разладу ў адносінах з Еўропай, заявіў прэзідэнт Расіі Уладзімір Пуцін на Пецярбургскім міжнародным эканамічным форуме.
Ён сказаў, што палітыкам пара пайсці насустрач бізнэсу і вярнуць давер у расійска-еўрапейскія адносіны.
Пуцін заявіў пра неабходнасць знізіць геапалітычныя рызыкі. Збольшага, па яго словах, напружаная геапалітычная сітуацыя звязаная менавіта з эканамічнымі цяжкасцямі, якія перажываюць краіны.
Тым не менш Пуцін лічыць, што не Расія стала ініцыятарам цяперашняй напружанасці ў яе адносінах з ЕС, а санкцыі, якія яна ўвяла, былі ў адказ.
Раней былы прэзідэнт Францыі Нікаля Сарказі заявіў аб неабходнасці адмены санкцый, уведзеных Расіяй і ЕС, прычым першай, на яго думку, на гэта павінна рашыцца менавіта Расія.
На форум прыехаў старшыня Еўракамісіі Жан-Клод Юнкер, які сустрэўся напярэдадні з Уладзімірам Пуціным. Юнкер таксама заклікаў да нармалізацыі адносін паміж Расіяй і Еўропай.
