«Па вясне машыну бралі ў арэнду, а цяпер стаіць», — так у «Зелянбудзе» гавораць пра машыну для перасадкі дрэў «Апцімал». Яе выкарыстоўвалі падчас будаўніцтва жылога раёна «Новая Баравая».
Фота wildlife.by
Тады перасадзілі 25-гадовы дуб. Дрэва прыжылася і цяпер радуе мясцовых жыхароў.
«Машына ў асноўным выкарыстоўваецца ўвесну і ўвосень, залежыць ад замоваў. Стогадовую таполю не перасадзяць. А вось дрэвы 20-30 гадоў перанесці можна», — распавядаюць пра цуд тэхнікі ў філіяле «Мінскзелянбуда» «Броўкі». Менавіта ў іх, у Мінскім раёне, стаіць машына па перасадцы «Апцімал».
Цяпер яе не выкарыстоўваюць: адна гадзіна працы машыны каштуе 354 тысячы ў будні і 409 тысяч у выхадныя плюс дарога. Высекчы дрэва значна даражэй: 1,1 мільёна, калі дыяметр меншы за 30 сантыметраў. Даражэй за перасадку больш чым у тры разы!
Але чаму машыну не выкарыстоўваюць, каб пазбегнуць канфліктаў з гараджанамі і захаваць расліннасць, тым больш калі гэта каштуе танней?
Аказваецца, высечка выгаднейшая: заказчык атрымоўвае чыстую пляцоўку, дзе можа ездзіць тэхніка, а падрадчык — больш грошай за працу.
«Арганізацыі выгадна зарабіць, тым больш калі яна не фінансуецца з бюджэту. Нашмат выгадней для выканаўцы высекчы дрэвы. Арганізацыя будаўнічай пляцоўкі — гэта таксама сродкі. І тут ставіцца задача мінімізацыі расходаў. Ставіцца задача, каб было зручна працоўным, каб эканоміць бензін. Тут усё залежыць ад свядомасці забудоўшчыка», — тлумачыць «гарадскі ляснічы» Ігар Корзун.
Атрымліваецца, што захаванне дрэў — усё адно лішнія траты для забудоўшчыка. Але калі будучыя пакупнікі жылля захочуць зялёны раён і гатовыя за гэта пераплаціць, перашкодаў няма:
Можна замовіць праект з захаваннем дрэў, звярнуўшыся да тых, хто дрэвы перасадзіць (на сёння ў Мінску дзве машыны для перасадкі).