Больш за палову расіян (56%) гатовыя падзяліцца сваімі даходамі з краінай у выпадку вайны, сведчаць дадзеныя апытання УЦДГМ.
Амаль 39% расіян гатовыя перадаць чвэрць сваіх даходаў у пазыку дзяржаве, яшчэ 17% апытаных аддалі б на ваенныя патрэбы менш за чвэрць заробленага.
31% рэспандэнтаў не гатовыя дзяліцца сваімі прыбыткамі з дзяржавай, нават калі Расія ўступіць у вайну.
65% апытаных падтрымалі б рашэнне сваіх блізкіх пайсці на вайну ў выпадку неабходнасці. З іх 49% параілі б сваякам адправіцца проста на лінію фронту, 16% настойвалі б на тым, каб сваяк ішоў у тылавыя часткі, далей ад фронту. Не ісці ў ваенкамат сваім блізкім параілі б толькі 15% расіян.
У цэлым жа ўзровень патрыятызму, ацэнены сацыёлагамі, знізіўся на 10 пунктаў з восені 2014 года, калі гэты паказчык быў на ўзроўні 72 пункта. Патрыётамі сябе называюць 80% расіян, з іх 46% — «безумоўна», яшчэ 34% сказалі, што «хутчэй, адчуваюць сябе патрыётамі». У адсутнасці патрыятычных пачуццяў прызналіся 18% рэспандэнтаў.
У цэлым, як адзначаюць даследчыкі, «эмацыйны фон у дачыненні да краіны ў апошнія некалькі гадоў стаў больш пазітыўным». Большасць апытаных адчуваюць станоўчыя пачуцці ў адносінах да Расіі: для 36% рэспандэнтаў пераважнае пачуццё ў адносінах да краіны — надзея, для 32% — павага і для 24% — любоў. Пераважна захапленне ў адносінах да краіны адчуваюць толькі 9%.
У студзені стала вядома, што расійскія ўлады ў бліжэйшыя пяць гадоў маюць намер выдаткаваць больш за 1,6 млрд рублёў на патрыятычнае выхаванне насельніцтва. 1,57 рублёў прадугледжана на гэтыя мэты з дзяржбюджэту.
У рамках прынятай урадам праграмы пад назвай «Патрыятычнае выхаванне грамадзян РФ на 2016-2020 гады» ўлады маюць намер прышчапіць насельніцтву пачуццё вернасці Айчыне і гатоўнасць абараняць інтарэсы Радзімы.
