Каля выспы Матуа на дне акіяна была знойдзеная амерыканская падводная лодка SS-233 «Херынг» («Селядзец»), патопленая ў 1944 годзе японцамі, паведамілі на мінулым тыдні расійскія СМІ.
Лодка ляжыць на глыбіні 104 метраў. Разам з ёй загінуў увесь экіпаж — 84 чалавекі.
У маі 1944 году яна выйшла ў мора з мэтай знішчэння японскіх марскіх камунікацый і пазней паведаміла па радыё, што патапіла 2 японскія судны.
Пазней стала вядома, што субмарына 1 чэрвеня атакавала і знішчыла яшчэ 2 японскія грузавыя судны ў невялікай затоцы побач з берагам выспы Матуа. Аднак пасля атакі лодка не паспела адступіць па вузкім і плыткім фарватэры і атрымала пашкоджанні ад агню японскай берагавой артылерыі.
Пасля таго як лодка, якая праваявала амаль усю вайну як на Атлантыцы, так і ў Ціхім акіяне, выйшла ў акіян і паспрабавала пайсці пад воду, яна патанула.
Матуа, дзе не было цывільнага насельніцтва, быў пераўтвораны японцамі ў крэпасць-выспу — на ёй былі пабудаваныя дзясяткі даўгатэрміновых і часовых агнявых умацаванняў. Гарнізон налічваў каля 4 тыс. жаўнераў і афіцэраў.
Цяпер выспа ўваходзіць у лік Курыльскіх выспаў, якія знаходзяцца пад расійскім кантролем, але іх дзяржаўна-прававы статус дагэтуль аспрэчваецца Японіяй.