У Беларусі спынены абмен 50-рублёвых купюр узору 2000 і 2010 гадоў. Да канца працоўнага дня 30 чэрвеня іх можна было абмяняць у аддзяленнях Нацбанка.
У Мінску гэта можна было зрабіць у Цэнтральным апараце Нацбанка на вул. Талстога да 16 гадзін. Абмен купюр быў адной з нямногіх аперацый, якія ажыццяўляў Нацбанк напярэдадні дэнамінацыі. У 15.48 карэспандэнт БелаПАН абмяняў чатыры 50-рублёвыя банкноты, якія заставаліся ў яго, на соценныя, якія яшчэ застаюцца ў звароце. Перад ім малады чалавек «здаваў» не менш за пяць пачкаў гэтых купюр, а на стале ў касіра пачкаў было каля дзясятка.
Супрацоўніца банка не змагла сказаць, наколькі актыўна насельніцтва абменьвала купюры ў апошні дазволены дзень, адзначыўшы толькі, што для гэтай аперацыі засталося 12 хвілін. На выхадзе з будынка Нацбанка карэспандэнт заўважыў маладога чалавека, які з адкрытым кашальком, поўным 50-рублёвых купюр, ішоў насустрач.
Праз 15 хвілін у аддзяленні «Ідэя Банка» на Прывакзальнай плошчы карэспандэнт БелаПАН назіраў, як пажылая жанчына спрабавала абмяняць некалькі 50-рублёвых купюр, але ёй было адмоўлена. «Нічога, дробязь», — махнула яна рукой і пайшла.
50-рублёвая купюра была ўведзена ў абарачэнне падчас дэнамінацыі 1 студзеня 2000 года (1:1.000). На ёй намаляваная Брэсцкая крэпасць. У 2010 годзе ў сувязі з рэформай беларускай мовы ў абарачэнне пачатла ўводзіцца купюра з надпісам «пяцьдзясят рублёў» замест «пяцьдзесят рублёў».
1 студзеня 2015 года выпуск купюр у абарачэнне быў спынены. Да 1 ліпеня 2015 года іх прымалі пры ўсіх плацяжах. З 1 ліпеня па 31 снежня 2015 года гэтыя купюры можна было абмяняць у Нацбанку і банках, з 1 студзеня па 30 чэрвеня 2016 года — толькі ў Нацбанку.
