AP
Міністэрства замежных спраў Калумбіі паведаміла, што, прынамсі, 35 тысяч жыхароў Венесуэлы перасеклі мяжу паміж краінамі падчас часовага яе адкрыцця 16 ліпеня на пераходзе ў раёне горада Кукута.
У Калумбіі венесуэльцы набываюць ежу, лекі і прадметы першай неабходнасці.
Раней меркавалася, што мяжу адкрыюць ў нядзелю, але каб пазбегнуць вялікай колькасці людзей гэта было вырашана зрабіць і ў суботу, перадае «Бі-бі-сі».
Па звестках ведамства, на мінулым тыдні за 12 гадзін у Калумбіі таксама пабывалі каля 35 тысяч венесэульцаў.
Да закрыцця мяжы Венесуэлы і Калумбіі яе перасякалі штодня больш за 100 тысяч чалавек. У жніўні 2015 года прэзідэнт Венесуэлы Нікалас Мадура загадаў закрыць мяжу, каб спыніць кантрабанду з краіны тавараў, якія прадаваліся па заніжаных цэнах.
Мяжа была адкрыта на 12 гадзін пасля таго, як каля 500 жанчын з венесуэльскага штата Тачыра прарваліся праз мяжу, каб купіць у калумбійскім горадзе Кукута ежу і тавары першай неабходнасці.
Венесуэла ў апошнія гады сутыкнулася з вострым эканамічным крызісам, які ўскладняецца з прычыны падзення сусветных цэнаў на нафту. У шэрагу рэгіёнаў краіны жыхары адчуваюць недахоп харчавання і тавараў першай неабходнасці. У Венесуэле абвешчана надзвычайнае эканамічнае становішча.
