Следства па справе аб забойстве журналіста Паўла Шарамета схіляецца да версіі, што мэтай злачынцаў быў менавіта ён.

Пра гэта паведамляе ўкраінскі сайт Zn.ua са спасылкай на крыніцу ў праваахоўных органах.

Да такога вываду схіляе папярэдняя інфармацыя, атрыманая следчай групай у працэсе першасных даследаванняў цела і аўтамабіля загінулага.

«Разлік быў дакладны і правільны. Выбухоўкі было закладзена роўна столькі, каб хапіла толькі для кіроўцы, і не зачапіла нікога побач. Калі б выбуховая хваля пайшла ўніз, яе б істотна загасіла зямля, але яна пайшла ўверх і налева. Гэта было паляванне выключна на ахвяру забойства», — сказаў суразмоўца.

«Калі б у машыне былі пасажыры, то яны, хутчэй за ўсё, выжылі б. Гэта сведчыць аб тым, што разлік быў асабліва на паражэнне месца кіроўцы, а не на знішчэнне ўсёй машыны», — дадаў ён.

Па словах крыніцы, судмедэксперты ўжо скончылі працу над целам загінулага журналіста і зрабілі высновы, што смерць здарылася ў выніку несумяшчальных з жыццём траўмаў і страты крыві.

«Мінна-выбухная траўма, смерць наступіла ад вялікай хуткай і крытычнай для жыцця (адна—дзве хвіліны) страты крыві і шоку. Шанцаў не было», — сказаў суразмоўца.

Камера відэаназірання зафіксавала момант закладання выбухоўкі пад аўтамабіль, у якім загінуў журналіст Павел Шарамет, паведамляе выданне.

«Адна з камер зафіксавала момант закладання выбухоўкі пад машыну Алены Прытулы ў ноч з 19 на 20 ліпеня», — дадае выданне.

Хочаш падзяліцца важнай інфармацыяй ананімна і канфідэнцыйна?