Пантыфік заклікаў прысутных на плошчы Святога Пятра маліцца за супакой загінулых
«У гэты час наша душа чарговы раз узрушана сумнымі навінамі, звязанымі з жудаснымі актамі тэрарызму і насілля, якія выклікалі боль і смерць. Я маю на ўвазе драматычныя падзеі ў Мюнхене ў Германіі і ў Кабуле ў Афганістане, дзе былі забітыя многія нявінныя людзі», — сказаў пантыфік 24 ліпеня 2016 г. падчас нядзельнай малітоўнай сустрэчы з вернікамі на плошчы св. Пятра.
Ён выказаў сваю блізкасць сем’ям загінулых і параненых і запрасіў сабраных на ватыканскай плошчы і ля радыё- і тэлепрымачоў далучыцца да яго малітвы, каб Бог натхняў усе добрыя і братэрскія намеры. «Чым больш непераадольнымі здаюцца цяжкасці і змрочнымі перспектывы бяспекі і міру, тым настойлівейшай павінна быць наша малітва», — падкрэсліў Папа.
Свае спачуванні ў сувязі з падзеямі ў сталіцы Баварыі Францішак даслаў на імя арцыбіскупа Мюнхенска-Фрайзінгскага, кардынала Рэйнхарда Маркса. У тэлеграме за подпісам кардынала Дзяржсакратара Пьетра Параліна гаворыцца, што Пантыфік «лучыцца ў смутку і жалобе і выказвае сваю блізкасць у болю», «у малітве давярае памерлых Божай міласэрнасці», усім, хто пацярпеў ад нападу, выказвае сваё глыбокае спачуванне і дзякуе за дапамогу службам экстранай дапамогі і бяспекі. «Францішак просіць Езуса, Пана жыцця, каб усім даў сілы і суцяшэнне і прынёс надзею», — гаворыцца ў тэлеграме.
Таксама ў сваім профілі ў сацыяльнай сетцы «Twitter» Папа запэўніў у сваёй малітоўнай памяці». «Я малюся за ўсіх ахвяраў тэрарызму ў свеце. Прашу, ніколі больш тэрарызму! Гэта шлях без выхаду», — напісаў ён.
У Мюнхене 18-гадовы чалавек забіў 22 ліпеня ў гандлёвым цэнтры 9 асоб і параніў 27, а затым пакончыў з сабой. Тэракт у Кабуле адбыўся 23 ліпеня. Адказнасць ўзяла на сябе тэрарыстычная групоўка «Ісламская дзяржава». 80 чалавек загінулі, больш за 230 атрымалі раненні.
