У сталічным метро створаны сітуацыйны цэнтр, паведаміў на прэс-канферэнцыі 26 ліпеня намеснік дырэктара па эксплуатацыі дзяржпрадпрыемства «Мінскі метрапалітэн» Андрэй Міхайлоўскі.
У цэнтр набраны штат супрацоўнікаў, і ўжо кругласутачна дзяжураць работнікі. «Яны ўзаемадзейнічаюць з тэхнічнымі службамі метрапалітэна, збіраюць інфармацыю і пры ўзнікненні надзвычайных сітуацый працуюць з гарадскімі службамі, у тым ліку аварыйна-выратавальнымі, транспартнымі, МНС і сілавымі ведамствамі ў залежнасці ад выпадку», — сказаў Міхайлоўскі.
Ён паведаміў, што зараз ажыццяўляецца мантаж і наладка закупленага ў красавіку абсталявання для сітуацыйнага цэнтра. «Ужо сёння на манітор можна вывесці выяву з любой відэакамеры на любой станцыі, паглядзець сітуацыю як з пасажырапатокам, так і НЗ. Сістэма працуе, людзі працуюць, і гэта сябе апраўдвае», — адзначыў намеснік дырэктара.
Наладжаная праца надглядных зон у вестыбюлях станцый. «Зоны надгляду створаныя на ўсіх станцыях метрапалітэна, і іх дастаткова, улічваючы, што мы робім надгляд пасажыраў выбарачна. Інспектары службы бяспекі праходзяць адпаведнае навучанне, яны здольныя вызначаць менавіта тых пасажыраў, якіх неабходна накіраваць на гэты надгляд. У прынцыпе прапускная здольнасць зон надгляду адпавядае патрабаванням бяспекі», — дадаў Міхайлоўскі.
Ён паведаміў, што паводле вынікаў першага паўгоддзя мінскім метро перавезена 147,3 млн. пасажыраў, у тым ліку 85,5 млн. — на першай лініі, 61,8 млн. — на другой. Удзельная вага метро ў перавозках гарадскога транспарту склала 39,4%. Самымі запатрабаванымі станцыямі з'яўляюцца «Плошча Леніна» (62,1 тыс. пасажыраў на дзень), «Плошча Якуба Коласа» (51,1 тыс.), «Уручча» (68,1 тыс.), «Каменная Горка» (60, 6 тыс.), «Няміга» (35,1 тыс.).
Што да формы аплаты, то з дапамогай жэтонаў праезд аплацілі 36,4% пасажыраў, бескантактных смарт-карт «Мінсктранса» — 42,4%, праязных на метрапалітэн — 10,4%, СМС-білетаў — менш за 0,1%, бясплатным праездам скарысталіся 10,7%.
