09:15
«Героям слава!»: група ўкраінскіх дзяцей павіншавала ўдзельнікаў #СвятаНезалежнасці. Кожны атрымаў бел-чырвона-белую стужку.
09:13
Акцыя паціху сканчаецца. Яе ўдзельнікі паціху згортваюць сцягі. Карэспандэнты «Нашай Нівы» налічылі каля 30 сцягоў. Сярод удзельнікаў былі Зміцер Дашкевіч, Павел Вінаградаў, Вольга Мікалайчык, Ніна Багінская, Максім Вінярскі.
09:11
На Плошчу Незалежнасці пад'ехала палівальная машына, каб паліць кусты, што растуць уздоўж прыпынку.
«Не саромцеся, смела палівайце», — раіць яму нейкі мужчына ў цывільным з дзвюма рацыямі. Але работнік камунальнай службы палівае акуратна, каб вада не трапіла на ўдзельнікаў акцыі.
09:10
Шмат цікавяцца мэтамі акцыі турысты, што жывуць у гатэлі «Мінск». Яны спыняюцца каля аўтобусаў, распытваюць удзельнікаў. Тыя тлумачаць.
09:05
Зміцер Дашкевіч у каментары «Нашай Ніве» сказаў, што акцыя атрымалася. Па ягоных словах, з удзельнікаў акцыі маладафронтаўцаў толькі палова. Іншыя людзі бралі сцягі і далучаліся да акцыі, кажа ён.
Іншы ўдзельнік — 45-гадовы мужчына — зазначыў, што ўпершыню ўдзельнічае ў такіх акцыях. Ён кажа, што 27 ліпеня — сапраўднае свята, а не 3 ліпеня.
09:00
Карэспандэнт «Нашай Нівы» разгаварыўся з удзельнікам акцыі, 50-гадовым мужчынам. Ён кажа, што працуе экскаватаршчыкам, першы раз прыйшоў на акцыю. «Я гаварыць прыгожа не ўмею. А наогул — Жыве Беларусь!».
Тым часам міліцыя нервуецца.
Машыны, што едуць праспектам, вітальна сігналяць.
Міліцыянер спрабуе дагнаць Ніну Багінскую, фота Антона Матолькі
08:53
Фота Ірыны Арахоўскай
Удзельнікаў некалькі дзясяткаў чалавек. Ланцуг расцягнуўся на 250 метраў, ён цягнецца ад аўтобуснага прыпынку, праз гасцініцу «Мінск», кінатэатр «Цэнтральны» пад будынак КДБ. Вельмі шмат міліцэйскіх камер.
08:45
Удзельнікі акцыі, іх каля 20 чалавек, стаяць з боку прыпынку машруту аўтобуса №100 у бок вуліцы Маскоўскай. Яны ўсе са сцягамі. Раздаюць бел-чырвона-белыя стужкі людзям на вуліцы. Тыя ахвотна бяруць.
Міліцыя ўжо складае пратаколы. Зміцер Дашкевіч раіць тым, на каго складаюць пратаколы, казаць, што яны не разумеюць па-руску.
08:40
08:35
Фота Ірыны Арахоўскай
08:32
Фота Ірына Арахоўская
08:30
Акцыя пачалася.
08:26
Людзі ў цывільным ужо здымаюць.
***
Прадпрымальнік, былы палітвязень Зміцер Дашкевіч прапанаваў сёння а 8.30 правесці акцыю Свята Незалежнасці. Актывісты заклікалі выйсці на мінскую плошчу Незалежнасці з нацыянальнымі сцягамі.
«Зранку — каб увесь народ перад тым, як пайсці на працу, змог адсвяткаваць слаўную дату нашай гісторыі. Хто не спужаецца ўвечары, не спужаецца і раніцай», — кажа Дашкевіч.
Гэта не адзіная акцыя ў гонар былога афіцыйнага Дня Незалежнасці, запланаваная на сёння.
Каля Філармоніі (плошча Якуба Коласа) будзе праведзены пікет Партыі БНФ. Плануецца, што а 17.00 прэтэндэнты ў кандыдаты ад гэтай партыі утвораць ланцуг з бел-чырвона-белымі сцягамі. Завершыцца пікет уручэннем Памятнага знаку імя Віктара Івашкевіча.
Увечары, прыкладна а 19-й, на перакрыжаванні вуліц Сухараўская і Лабанка (насупраць ГЦ «Максімус») адбудзецца бясплатны канцэрт Лявона Вольскага. Таксама ў імпрэзе возьмуць удзел тэлевядоўца Юры Жыгамонт і мастак Алесь Пушкін.
Пройдзе ён таксама ў рамках святкавання Дня 27 ліпеня і перадвыбарчага пікета кандыдата ад Руху за свабоду Алеся Лагвінца.