Суд па адміністрацыйнай справе грамадзянкі Расіі Марыі Рымар, затрыманай у мінскім аэрапорце за непраўдзівае паведамленне аб небяспецы, працягнецца 4 жніўня. Пра гэта Рымар паведаміла БелаПАН па выніках пасяджэння суда Кастрычніцкага раёна Мінска, якое адбылося 1 жніўня.
Нагадаем, юрыст грамадскага ЛГБТ-руху «Аверс» з Самары Марыя Рымар, якая накіроўвалася з Кіева ў Маскву транзітам праз Беларусь, была затрымана ў мінскім аэрапорце 7 ліпеня. Паведамлялася, што яна няўдала пажартавала ў размове з інспектарам службы грамадскай бяспекі ў пункце надгляду перад пасадкай на рэйс, заявіўшы, што ў яе ў сумцы выбуховае рэчыва.
У дачыненні да Рымар была распачата крымінальная справа за непраўдзівае паведамленне аб небяспецы, а таксама адміністрацыйная справа за непадпарадкаванне патрабаванням супрацоўнікаў міліцыі. Да 18 ліпеня яе ўтрымлівалі ў СІЗА ў Мінску і Жодзіне, затым выпусцілі пад залог памерам 2,5 тыс. дэнамінаваных рублёў. На ўвесь час разбору па крымінальнай справе, уключаючы даследчую праверку, следства і разгляд справы, Рымар не мае права пакідаць тэрыторыю Беларусі.
Учора ў суд, паводле слоў Рымар, з'явіліся абедзве асобы, чые апытанні знаходзяцца ў матэрыялах адміністрацыйнай справы: супрацоўніца службы перадпалётнага надгляду аэрапорта і супрацоўнік АУС, «з ліку міліцыянераў, якія ўдзельнічалі ў затрыманні і прымянялі сілу пры дастаўленні ў дзяжурную часць». «Супрацоўніца сектара надгляду таксама паведаміла суду пра тое, што стала сведкай канфіскацыі ў мяне пашпарта з прымяненнем грубай сілы супрацоўнікам АУС, які знаходзіўся пры выкананні службовых абавязкаў. Гэты інцыдэнт адбыўся ў яе прысутнасці каля 21.00 вечара 7 ліпеня, калі я была запрошана ў аддзяленне міліцыі для апытання», — паведаміла актывістка.
Акрамя таго, у судзе быў прагледжаны запіс камер назірання, далучаны да справы. Судом вырашана апытаць у якасці сведак іншых асоб, якія ўдзельнічалі ў афармленні адміністрацыйнага пратакола.
Адказваючы на пытанне аб ходзе расследавання распачатай у дачыненні да яе крымінальнай справы, Рымар паведаміла: «Падчас майго апошняга наведвання СК мне паведамілі, што для заканчэння папярэдняга следства не хапае толькі аднаго дакумента. Гэта даведка з псіханеўралагічнага дыспансера па маім месцы жыхарства аб тым, што я не знаходжуся ў іх на ўліку. Цяпер следству дакладна вядома, што я не знаходжуся на псіхіятрычным уліку».
Раней у інтэрв'ю БелаПАН Рымар паведаміла, што інфармацыя аб тратыле ў сумцы не была жартам. Паводле яе слоў, гэта было «спробай пазбегнуць зневажальнага годнасць абыходжання» пры асабістым надглядзе. Не згодна Рымар і з тым, што яна нібыта не падпарадкавалася законнаму патрабаванню супрацоўнікаў міліцыі. «У адміністрацыйнай справе я таксама не бачу складу. У фактуры справы напісана, што я адмаўлялася прад'явіць пашпарт і прайсці для дачы тлумачэнняў. Але я прад'яўляла пашпарт там, неаднаразова, і я спадзяюся, што гэта будзе зафіксавана. Больш за тое, я супраціўлялася спробе забраць у мяне пашпарт сілай, што супрацоўнікі міліцыі спрабавалі зрабіць шмат разоў. І ў выніку ён з прымяненнем грубай сілы быў канфіскаваны — пасля дня здзекаў: без ежы, практычна без вады», — заявіла юрыст.
