Кіраўнік незалежнай камісіі ВАДА Рычард Макларэн. Фота Reuters.
Міжнародны алімпійскі камітэт (МАК) і міжнародныя спартыўныя арганізацыі няправільна вытлумачылі даклад расследавання незалежнай камісіі Сусветнага антыдопінгавага агенцтва (ВАДА). Пра гэта кіраўнік незалежнай камісіі ВАДА Рычард Макларэн заявіў брытанскаму выданню The Guardian.
«Грамадскасць, у прыватнасці МАК і міжнародныя федэрацыі, няправільна вытлумачылі даклад. У ім гаварылася пра сістэму допінгу ў Расіі, а не пра тое, якія спартсмены парушалі антыдопінгавыя правілы, — заявіў кіраўнік камісіі ВАДА. — У мяне проста не было часу на выяўленне спартоўцаў».
Макларен адзначыў, што ўсе факты ў дакладзе падмацаваныя доказамі.
«Я быў на той стадыі, калі я мог сказаць усё, што я ведаў без усялякіх сумневаў, — падкрэсліў ён. — Я не стаў бы нічога ўключаць у свой даклад, калі б у мяне не было доказаў, бо гэта не адпавядае крымінальным стандартам любой краіны свету. Магу запэўніць, што ў мяне ёсць доказы, падмацаваныя аналізам базаў дадзеных, узорамі прабірак, але я іх не прадставіў».
Незалежная камісія ВАДА пад кіраўніцтвам Макларэна 18 ліпеня прадставіла даклад аб выніках расследавання абвінавачванняў у допінгавых махінацыях на Алімпійскіх гульнях 2012 і 2014 гадоў. У дакладзе сцвярджаецца, што сістэма па ўтойванні станоўчых допінг-пробаў у Расіі ўжывалася ў 643 выпадках з 2011 па 2015 год. Усяго ў ёй былі задзейнічаныя атлеты з 30 відаў спорту. На аснове дакладу выканкам ВАДА рэкамендаваў МАК, Міжнароднаму паралімпійскаму камітэту і ўсім міжнародным спартовым федэрацыям адхіліць расійскіх спартоўцаў ад удзелу ў сваіх спаборніцтвах.
