05.08.2016 / 17:37

Выбаркам адмовіў у задавальненні скаргі Алеся Лагвінца 4

Мінская гарадская выбарчая камісія адмовіла ў задавальненні скаргі прэтэндэнта ў дэпутаты Алеся Лагвінца на папярэджанне, вынесенае яго ініцыятыўнай групе акруговай камісіяй Сухараўскай акругі № 101.

Папярэджанне ініцыятыўнай групе было вынесенае 29 ліпеня. На думку акруговай камісіі, група парушыла патрабаванне выбарчага заканадаўства ў частцы невыканання абмежаванняў пры зборы подпісаў, «якая выявілася ў раздачы друкаваных матэрыялаў выбаршчыкам падчас збору подпісаў, а таксама ўзнагароджання выбаршчыкаў за ўнясенне подпісу ў падпісныя лісты».

У скарзе ў гарадскую камісію Лагвінец паказаў, што ні ён, ні яго ініцыятыўная група «не ўзнагароджвала выбаршчыкаў за падтрымку яго вылучэння ў дэпутаты». Пры гэтым ён адзначае, што ў рашэнні акруговай камісіі адсутнічаюць звесткі, кім, калі магло ажыццяўляцца такое ўзнагароджанне, колькі чалавек яго маглі атрымаць. Таксама Лагвінец патлумачыў, што не мог прысутнічаць на ўсіх пікетах асабіста, а таму на іх раздаваліся яго візіткі, каб грамадзяне пры жаданні маглі з ім звязацца не толькі як з прэтэндэнтам у дэпутаты, але і намеснікам старшыні праваабаронча-асветніцкага аб'яднання.

Як паведаміў БелаПАН Лагвінец, Мінская гарадская камісія не падтрымала яго довады. «У іх апынулася шмат, верагодна напісаных пад дыктоўку адміністрацыі раёна, скаргаў, у якіх людзі скардзяцца на пікеты і гэтак далей», — сказаў ён, выказаўшы здагадку, што кандыдатам у дэпутаты яго наўрад ці зарэгіструюць.

Адзначым, што ініцыятыўную групу Лагвінца папярэджвалі яшчэ адзін раз — за агітацыю 27 ліпеня на пікеце па зборы подпісаў за вылучэнне кандыдатам у дэпутаты ў сталічным мікрараёне Сухарава, на якім адбыўся паўтарагадзінны канцэрт вядомага рок-музыкі Лявона Вольскага.

Адзначым, два папярэджанні могуць стаць падставай для адмовы ў рэгістрацыі кандыдатам у дэпутаты.

0
Андрусь / Адказаць
05.08.2016 / 19:04
А ён так ужо хоча быць кандыдатам? І так разварушыў дастаткова балота абыякавасці ў тым Сухараве! Рэспект за тое, што выкарыстаў пікетную магчымасць максімальна эфектыўна!
0
а то! / Адказаць
05.08.2016 / 19:17
Лідка на варце! Гэта яе апошнія дурыбары. Яе лебядзіная песьня! Яна гэта разумее. І Сам Самыч - таксама. Захад гэтыя дурыбары павінен - па няўмольных абставінах - прызнаць. Але так, каб Лідка сышла. І ўсё пачалося "на новенькага". Яму і перадасьць свой неацэнны досьвед нашая парыжанка па абставінах.
0
бясцэнны кадр / Адказаць
05.08.2016 / 19:41
а то!, да на ней яшчэ пахаць можна, як сказаў прэзідэнт.
Паказаць усе каментары/ 4 /
Каб пакінуць каментар, калі ласка, актывуйце JavaScript у наладах свайго браўзеру