Так, новы сквер у межах вуліц Іосіфа Гашкевіча, Уладзіслава Сыракомлі і Янкі Лучыны прапанавана назваць Вілкаўшчына. Як растлумачылі ў Камісіі па найменні і перайменаванні праспектаў, вуліц, плошчаў і іншых складовых частак Мінска, у жылым раёне Лошыца будзе слушней увекавечыць назву вёскі, якая існавала тут раней, чым даць трывіяльную назву «Лошыцкі» або ў гонар Сыракомлі, Гашкевіча альбо Лучыны.
Яшчэ чатыром праектаваным вуліцам і тром завулкам прапанаваны назвы з улікам тапанімічнай сітуацыі, якая ўжо склалася. І на самай справе, лагічна, што завулкі 1-ы і 2-і Ратамскія, Княгінінскія павінны быць каля вуліц Ратамскай і Княгінінскай. Як і тое, што праектаваную побач з існуючымі вуліцамі Астрожскіх і Тышкевічаў вуліцу назавуць у гонар вядомага беларускага шляхецкага роду Ельскіх.
Рэспубліканская з'явіцца недалёка ад Палаца Незалежнасці. Гэта прыгожая назва ўжо была на карце сталіцы, але знікла ў 1993 годзе.
А вось назва «Міхалоўская» — новая. Цяпер ёсць вуліца Міхалова. Праўда, на ёй толькі некалькі будынкаў, якія ў перспектыве знясуць. Так што праз назву праектаванай Міхалоўскай тапонім у гонар мікрараёна ўдасца захаваць.
У раёне вуліцы Зарэчная і завулка Малы Трасцянец праектуецца Стайкаўская — якраз па дарозе да вядомага алімпійскага спарткомплексу «Стайкі».
А Ждановіцкая з'явіцца ў раёне вуліцы Масюкоўшчына.
Адну новую вуліцу прапанавана зрабіць іменнай. Яна атрымае назву ў гонар вядомай беларускай актрысы, педагога і пісьменніцы, першай выканаўцы ролі Паўлінкі ў аднайменнай камедыі Янкі Купалы Паўліны Мядзёлкі. Праектуецца вуліца ў раёне Выгоцкага.
Дарэчы, мінчане могуць выказацца па прапанаваных камісіяй назвах, накіраваўшы свае меркаванні і заўвагі ў галоўнае ўпраўленне ідэалагічнай работы, культуры і па справах моладзі Мінгарвыканкама (220006, г. Мінск, вул. Маякоўскага, 22, корпус 2) на працягу 2 тыдняў.
