Букмекеры пачалі прымаць стаўкі на Нобеля па літаратуры. У спісе ёсць палякі і эстонцы, але няма беларусаў, расейцаў і украінцаў
Праз месяц, меркавана 6 кастрычніка, будзе абвешчана імя сёлетняга лаўрэата Нобелеўскай прэміі па літаратуры. Буйныя букмекерскія канторы свету пачалі прыём ставак.
Летась букмекеры далі абсалютна правільны прагноз, што ўзнагарода дастанецца беларускай пісьменніцы Святлане Алексіевіч. Праўда, настолькі трапна адгадаць ім атрымліваецца не штогод. Аднак прэмія стабільна дастаецца некаму з першай дзясяткі букмекерскіх прагнозаў.
Першай пазіцыяй ужо нікога не здзівіць, яе займае звышпапулярны японскі пісьменнік Харукі Муракамі. Яму ўжо не першы год гадаюць самую прэстыжную літаратурную прэмію свету, аднак увесь час узнагарода сыходзіць да кагосьці іншага, то да кітайца Мо Яня, то да канадкі Эліс Манро. На Муракамі стаўкі прымаюцца з разлікам 1 да 5.
На другім месцы 86-гадовы сірыйскі паэт Адоніс, які шмат гадоў жыве ў эміграцыі. Апошнія гады, праўда, нобелеўскі камітэт не надта шануе паэтаў. У ХХІ стагоддзі Нобеля атрымліваў толькі адзін паэт — швед Томас Транструмер у 2011 годзе. На Адоніса стаўкі прымаюцца як 1 да 6,5.
Трэцяе і чацвёртае месцы ў класікаў сучаснай амерыканскай літаратуры Філіпа Рота (1 да 8) і Джойс Кэрал Оўтс (1 да 10). Як мінус для Оўтс можна адзначыць тое, што жанчыны яшчэ ніколі ў гісторыі не атрымлівалі Нобель па літаратуры два гады запар. Амерыканскія літаратары ж не мелі прэміі ўжо больш за 20 гадоў, калі ў 1993-м яе атрымала Тоні Морысан.
Яшчэ даўжэй — аж 28 гадоў — Нобеля ў літаратуры не здабывалі афрыканскія літаратары. Апошнімі сярод іх былі нігерыец Воле Шойінка (1986) і егіпцянін Нагіб Махфуз (1988). Сёлета на прэмію ад Афрыкі прэтэндуе кенійскі раманіст Нгугі ва Тхіёнга.
У першай дзясятцы таксама албанец Ісмаіл Кадарэ, нарвежац Юн Фосэ, ізраільцянін Амас Оз, венгр Петэр Надаш.
З блізкіх да Беларусі народаў у спісах таксама прысутнічаюць палякі Адам Загаеўскі і Вольга Такарчук, а таксама эстонцы Яаан Каплінскі і паэтка Дорыс Карэва.
Ніводнага расейскага ці ўкраінскага пісьменніка букмекеры не разглядаюць як прэтэндэнта на прэмію. Тое самае можна сказаць і пра беларускіх літаратараў.
Цяпер чытаюць
62-гадовую намесніцу дырэктара мінскай гімназіі адправілі ў калонію за палітыку3
62-гадовую намесніцу дырэктара мінскай гімназіі адправілі ў калонію за палітыку
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі3939
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі39
«Незалежнасць не падае з неба і не даецца назаўсёды. Яе трэба абараняць». Ціханоўская выступіла з заявай да 35-годдзя прыняцця Дэкларацыі аб суверэнітэце4747
Каментары