Група паляўнічых знайшла на поўдні Ісландыі меч вікінгаў, выраблены больш за тысячу гадоў таму.
Фотa: Arni Bjorn Valdimarsson
Каманда з пяці чалавек адправілася паляваць на гусей. Паляванне аказалася няўдалым — яны не падстрэлілі аніводнай птушкі, затое знайшлі старадаўні меч — меркавана, яго вымыла падчас нядаўняй паводкі.
Адзін з паляўнічых апублікаваў фатаграфію мяча на сваёй старонцы ў фэйсбуку і неўзабаве атрымаў званок з Агенцтва па культурнай спадчыне Ісландыі. У панядзелак артэфакт быў перададзены спецыялістам.
Дырэктар агенцтва Крысцін Сігурдардоцір кажа, што да гэтага часу ў Ісландыі былі знойдзеныя толькі 20 мячоў тысячагадовага ўзросту, што робіць знаходку асабліва значнай.
«Ён там проста ляжаў на зямлі, ва ўсіх на вачах, чакаў, калі яго падбяруць», — распавёў адзін з паляўнічых.
Паводле ацэнкі спецыялістаў, меч датуецца найпазней X стагоддзем. Імаверна, ён знаходзіўся ў паганскім пахаванні вікінгаў.
Дакладнае месца знаходкі не выдаецца — археолагі збіраюцца арганізаваць там раскопкі.
