Атрад «Пагоня», што ваяваў за Украіну, распускаецца і будзе займацца валанцёрскай дзейнасцю
Атрад беларускіх добраахвотнікаў «Пагоня», які браў удзел у баях на Данбасе на баку Украіны, мяняе фармат дзейнасці. Пра гэта гаворыцца ў паведамленні, апублікаваным у суполцы фэйсбука.
«Спыненне поўнамаштабных вайсковых дзеянняў на Усходзе Украіны прымусіла нас, беларускіх добраахвотнікаў атрада «Пагоня», перагледзець сваю ролю ў гэтай вайне, — паведамляе прэс-служба атрада. — Мы прыпыняем удзел у вайсковых дзеяннях і ствараем арганізацыю «Грамадскі сектар Атрада «Пагоня», якая ў першую чаргу будзе займацца рознабаковай дапамогай беларускім добраахвотнікам».
Байцы канстатуюць, што канфлікт на Данбасе замарожаны, у Расіі няма рэсурсаў весці вайну, а ўкраінскае войска стала нашмат больш прафесійным, што адкідае патрэбу далейшага ўдзелу беларусаў у вайне. Пры гэтым адзначаецца, што байцы «Пагоні» паспелі атрымаць баявы досвед.
Сярод сваіх новых задач атрад акрэслівае «падрыхтоўку беларускага грамадства да таго, што ўкраінскі сцэнар можа паўтарыцца ў Беларусі і да гэтага трэба рыхтавацца», а таксама «псіхалагічнае збліжэнне ўкраінскага і беларускага народаў».
«У выпадку ж калі нашая дапамога зноў спатрэбіцца Украіне, мы гатовыя ўзяць зброю ў рукі і дапамагчы братэрскаму народу», — падсумоўваюць байцы.
«Шынвізэ — кончаны садыст». Адзін з адыёзных начальнікаў калоніі Бабруйска перабраўся ў Германію28
Каментары