13 чэрвеня ксёндз біскуп Антоні Дзям’янка асьвяціў у Магілёве пляцоўку, дзе ўзводзіцца касьцёл сьвятога Антонія, а таксама звон будучай каталіцкай сьвятыні.
Асьвячэньне адбылося ў Дзень нябеснага заступніка Магілёва – сьвятога Антонія. На сьвятую ўрачыстасьць прыйшлі каля сотні вернікаў, а таксама прыехалі каталіцкія сьвятары з суседніх з Магілёвам прыходаў – са Шклова, Чувусаў, Мсьціслава ды Крычава.
Касьцёл у Магілёўскім Задняпроўі, блізу сьвятога возера, стане другой каталіцкай сьвятыняй у Магілёве. Пакуль на месцы будаўніцтва дзейнічае часовая капліца рыма-каталіцкага прыходу Сьвятога Антонія.
Сьвяты Антоні стаў апекуном Магілёва пры канцы XVI стагодзьдзя. Ягоны цудатворны абраз прынесьлі ў Магілёў францішканскія прапаведнікі. Абраз зьнік у часы вайны.
