У Светлагорску камунальныя службы спрабуюць праз суд выселіць інваліда-вазочніка Юрыя Ляшэнку
У судзе Светлагорскага раёна працягваюцца слуханні па іску КЖУП «Светач» да грамадзянскага актывіста Юрыя Ляшэнкі, інваліда-вазочніка.
Камунальнікі патрабуюць, каб грамадзянін вызваліў манеўранае жыллё, дадзенае яму на час капітальнага рамонту дома. Інвалід-вазочнік адмаўляецца ўсяляцца ў кватэру ў доме пасля капрамонту.
«Пасля капітальнага рамонту мая кватэра стала непрыдатная для пражывання. Пра безбар'ернае асяроддзе і гаворкі няма. Пасля капітальнага рамонту я не магу трапіць у ванную — унітаз усталяваны такім чынам, што я павінен неяк пераскочыць яго разам з вазком. Парушэнняў маса! Капітальны рамонт ідзе з 2012 года, і столькі ж гадоў мы вядзем барацьбу, каб наш дом быў прыдатны для пражывання. Зараз з васьмі кватэр заселеныя чатыры, астатнія, як і я, мыкаемся хто дзе», — пракаментаваў Ляшэнка.
Паводле яго слоў, дом не адпавядае супрацьпажарным нормам — замест жалезабетоннага перакрыцця пры капітальным рамонце была пакладзеная старая драўляная драніца. З множнымі парушэннямі пры капітальным рамонце ўжо неаднаразова разбіраліся розныя наглядныя органы. Зараз паводле патрабавання пракуратуры будзе праводзіцца будаўніча-тэхнічная экспертыза. «У гэтай кватэры жыць немагчыма, а камунальнікі патрабуюць выселіць мяне з манеўранага жылля без давання іншага жылля. І гэта пры дзясятках парушэнняў, у тым ліку фінансавых, дапушчаных пры капітальным рамонце. У суд камунальнікі неаднаразова падавалі падробленыя дакументы, мы на гэта звярталі ўвагу суда, але, як бачым, камунальным службам ўсё сыходзіць з рук», — адзначае інвалід.
Паводле яго слоў, у судзе высветлілася, што існуюць тры акты ўводу аб'екта ў эксплуатацыю, і незразумела — які з іх сапраўдны. «Арыгіналы актаў не падаюцца, камунальнікі кажуць, што нібыта іх канфіскаваў АБЭЗ, а з чаго ж тады копіі рабілі?» — задаецца пытаннем актывіст.
На мінулых выбарах Ляшэнка балатаваўся ў парламент ад Беларускай партыі «Зялёныя». Цяпер канфлікт з камунальнымі службамі, а таксама праблемы на працы ён звязвае з націскам на яго мясцовай улады з-за ўдзелу ў выбарах у якасці кандыдата. «Я дырэктар фірмы па перавозках. І ўжо з гэтага боку спрабуюць да мяне падкапацца. На адзін дзень мы пратэрмінавалі тэхагляд, і ўжо і ў транспартнай інспекцыі, і ў ДАІ з'явіліся да нас пытанні, аж да пазбаўлення ліцэнзіі. Нібыта невядомая жанчына, ананім, напісала скаргу, што яна ехала на нашым маршрутным таксі, у якога адсутнічаў тэхагляд. Хіба звычайныя пасажыры пытаюцца ў вадзіцеля маршруткі аб праходжанні тэхагляду і потым пішуць скаргі ва ўсе інстанцыі? Гэта націск на мяне. Я плачу падаткі, папаўняю бюджэт, працую шчыра, ствараю працоўныя месцы, а ўзамен атрымліваю жорсткі прэсінг», — лічыць экс-кандыдат.
Каментары