28.09.2016 / 10:33

Пяць драўляных храмаў Берасцейшчыны прапануюць унесці ў спіс ЮНЕСКА 7

Пяць драўляных цэркваў Брэсцкай вобласці прапануецца ўнесці ў спіс Сусветнай культурнай спадчыны, паведаміў карэспандэнту БелТА намеснік начальніка ўпраўлення культуры галоўнага ўпраўлення ідэалагічнай работы, культуры і па справах моладзі аблвыканкама Вячаслаў Гарбузаў.

Сумесна з Беларускай праваслаўнай царквой будзе праведзена работа па падрыхтоўцы намінацыйнага дасье на ўключэнне ў спіс ЮНЕСКА аб'ектаў культавага драўлянага дойлідства Палескага рэгіёна. У заяўку плануецца ўнесці тры бязвежавыя храмы: Нікіцкую царкву ў вёсцы Здзітава Жабінкаўскага раёна, царкву Параскевы Пятніцы ў вёсцы Збірагі і Міхайлаўскую царкву ў вёсцы Чэрск Брэсцкага раёна.

Здзітава, Нікіцкая царква (фота Мікалай Кузіч, globus.tut.by)

Збірагі, царква Параскевы Пятніцы (фота Мікалай Кузіч, globus.tut.by)

Чэрск, Міхайлаўская царква (фота Мікалай Кузіч, globus.tut.by)

Вялікую каштоўнасць уяўляюць Міхайлаўская царква ў вёсцы Сцяпанкі Жабінкаўскага раёна (тып базілікі), а таксама двухвежавая царква Параскевы Пятніцы са званіцай у вёсцы Дзівін Кобрынскага раёна.

Сцяпанкі, Міхайлаўская царква (фота Мікалай Кузіч, globus.tut.by)

Дзівін, царква Параскевы Пятніцы (фота Мікалай Кузіч, globus.tut.by)

«Кожны з гэтых драўляных храмаў, пабудаваных у XVII—XVIII стагоддзях, унікальны па сваёй сутнасці. Яны зведалі мінімальнае ўмяшанне ў канструкцыі, захаваўшы свой першапачатковы выгляд, і адлюстроўваюць рысы мясцовай архітэктурнай школы», — падкрэсліў Вячаслаў Гарбузаў і дадаў, што для ўключэння цэркваў у спіс Сусветнай культурнай спадчыны спецыялістам трэба правесці доўгую і скрупулёзную працу. У прыватнасці, неабходна сабраць архіўныя матэрыялы, вывучыць агульныя і адметныя рысы дойлідства беларускага Палесся ад украінскага і польскага, з дапамогай міжнародных экспертаў падрыхтаваць навуковае абгрунтаванне праекта. Комплексны план работы будзе зацверджаны на каардынацыйнай радзе па захаванні гісторыка-культурнай спадчыны Брэсцкай вобласці. Заяўку на разгляд у Камітэт сусветнай спадчыны мяркуецца падаць да 2020 года. Беларусы маюць намер падлучыцца да намінацыі аховы драўлянага дойлідства, у якой ужо значацца аб'екты Польшчы і Славакіі.

1
Некарэнны мянчук / Адказаць
28.09.2016 / 11:12
Амаль усе ў той ці іншай ступені страцілі аўтэнтычнае аблічча: бляха замест гонты, алейная фарба ненатуральных колераў, цыбуліны замест купалоў-баняў (у Сьцяпанках і Дывіне яшчэ бані, але на старых здымках купалы былі больш густоўнымі). Мабыць, грошы і ахоўны статус ЮНЭСКА - адзіная магчымасьць уратаваць, ці нават вярнуць аўтэнтычнае аблічча гэтым помнікам Палескай школы дойлідзтва.
7
sic! / Адказаць
28.09.2016 / 11:12
Як можна прапанаваць драўляныя храмы, фарбаваныя маслянымі фарбамі, у гэты Сьпіс?! Ад моманту, калі такая афарбоўка (наш біч!!!) была зробленая, гэтыя будынкі перасталі быць помнікамі архітэктуры. Яны нагадваюць табурэткі!
0
6 / Адказаць
28.09.2016 / 12:41
Если убрать краску с храмов и вернуть старые кресты (которые были заменены православными на свои) - то тяжело будет отличить от униатских церквей Закарпатья.
Паказаць усе каментары/ 7 /
Каб пакінуць каментар, калі ласка, актывуйце JavaScript у наладах свайго браўзеру