29.09.2016 / 12:17

Гурт BY CRY прэзентаваў кліп «Душа-яліна» ВІДЭА 3

Гурт BY CRY прэзэнтуе на Tuzin.fm свой новы сынгл «Душа-яліна» і кліп на яго.

Самі музыкі называюць сваю каманду «дзіцём постмадэрнізму». «Наша музыка мэтанакіравана прабуджае моц духа, абуджае стыхію радасьці і нястрыманую свабоду весялосьці», — кажа сьпявачка Аляксандра Грахоўская, якая і аб’яднала вакол сябе адзінадумцаў тры гады таму, каб зрэалізаваць даўнюю мару — запісаць альбом. За гэты час BY CRY паўдзельнічаў у шэрагу музычных фэстах ды зборных канцэртах, зьезьдзіў на «Басовішча», але альбом дагэтуль так і не пабачыў сьвет.

«Да нас прыйшло разуменьне таго, што прэзэнтаваць свае песьні асобным альбомам мы ня можам, бо кожны з нашых твораў — гэта самастойны сьвет. Таму ад нас можна пачуць і поп-рок, і гард-кор, і гранж, і фанк, і панк. Такім чынам мы дапамагаем праявіцца канцэптуальнаму зместу кожнай асобнай песьні», — тлумачыць Аляксандра. Улюбёны прыём музыкаў — зьвяртацца да народных сьпеўных здабыткаў, але падаваць іх па-свойму. Яскравы прыклад таму — новая праца BY CRY — «Душа-яліна», які прэзэнтуецца ў аўдыё- і відэа выглядзе. У яе запісе ўзялі ўдзел Аляксандра Грахоўская (вакал), Леў Бабаеўскі (ударныя), Аляксандар Маркевіч (бас-гітара), Сяргей Стэц (гітара), Яўген Валакіцін(акардэон), Марыя Сазонава (вакал). Праца вялася на двух студыях — «Галапагос studio» (гукарэжысэр Ільля Дмуха) іCherry Records Studio (гукарэжысэр Яўген Валакіцін).

Кліп на «Душа-яліна» здымаўся на хутары ў Вайцюшках. Музыкі дзякуюць ягонаму гаспадару Зьмітру Вайцюшкевічу за такую магчымасьць. Разам з Аляксандрай Грахоўскай у ім зьняліся акторкі рэспубліканскага тэатра беларускай драматургіі Марыя Пятровіч, Марына Дзямідчык, Гражына Быкава. Апэратарам роліка стаў Максім Бабіч, а рэжысэркай — сама Аляксандра. BY CRY таксама дзячыць за падтрымку і дапамогу Віктару Старухіну, Весце Бабіч, вакалісту гурта Sontsevorot Аляксандру Бузуну, Максіму Грахоўскаму.

Сачыць за навінамі гурта можна праз суполкі ЎК/FB ды афіцыйны сайт.

Песьня «Душа-яліна» возьме ўдзел у другім туры аўдыёчарту ў сэзоне 2016/2017. Яе можна паслухаць таксама на нашым канале на Soundcloud.

0
Stary_los' / Адказаць
29.09.2016 / 13:37
трэш
0
мixaсь / Адказаць
29.09.2016 / 13:52
Файна!
0
Касперович / Адказаць
29.09.2016 / 20:37
Скучаю по временам Мрои, НРМ, ЧпБ, IQ48... А это и музыкой назвать сложно
Каб пакінуць каментар, калі ласка, актывуйце JavaScript у наладах свайго браўзеру