Як высьвятляецца, Юр'я Азаронка звольнілі з пасады намесьніка старшыні Белтэлерадыёкампаніі зь вялікім скандалам.
Паводле ўказу прэзыдэнта, падпісанага 13 чэрвеня — Азаронак звольнены «за ўчынак, несумяшчальны са знаходжаньнем на дзяржаўнай службе» (падпункт 1.9 пункту 1 артыкулу 40 Закону «Аб дзяржаўнай службе ў Рэспубліцы Беларусь»).
Паводле радыё «Рацыя», гаворка ідзе аб непрыстойных паводзінах Азаронка ў часе выправы на «Эўрабачаньне» ў Бялград.
«Я ўспрыняў гэтую навіну дастаткова спакойна. Вызначуся бліжэйшым часам з тым, дзе буду працаваць. Маю прафэсію рэжысёра ў мяне не забяруць. Я як быў чалавекам прэзыдэнта, так ім і застануся. І буду працаваць на карысьць дзяржаве», — заявіў учора сам Азаронак, адзін зь піянэраў лукашэнкаўскае прапаганды.
