Японскі пісьменнік Харукі Муракамі на сваёй афіцыйнай старонцы ў фэйсбуку падзяліўся навіной Радыё Свабода аб тым, што лаўрэатка Нобелеўскай прэміі ў галіне літаратуры Сьвятлана Алексіевіч вітала б ягоную перамогу сёлета.
«Цяпер усе за Муракамі. Я люблю гэтага пісьменніка, хаця кажуць, што гэта спрошчаная літаратура. Мне падабаецца ўсходняя аранжыроўка падзеяў і іх разумення. Мне гэта цікава» — сказала Алексіевіч падчас візіту ў сядзібу Радыё Свабода ў Празе.
Муракамі ў спісе галоўных прэтэндэнтаў на Нобелеўскую прэмію ўжо не першы год. Паводле букмекераў, сёлета ў яго найбольшыя шанцы атрымаць ўзнагароду. За Муракамі ідуць сірыйскі паэт Адоніс, кенійскі пісьменнік Нгугі ва Тхіонга і амерыканец Філіп Рот.
Лаўрэат Нобэлеўскай прэміі за літаратуру будзе абвешчаны на наступным тыдні.
