Карыкатура з выставы «Сам-насам з кліматам».
Выстава падрыхтавана пры падтрымцы Пасольства Швецыі ў Рэспубліцы Беларусь і Шведскага інстытута.
Выстава «Сам-насам з кліматам» злучае класічны жанр карыкатуры з актуальнымі практыкамі і рознымі медыя (інсталяцыя, фатаграфія, калаж) сучаснага мастацтва, становіцца асновай і фундаментам камунікацыі без межаў, у тым ліку моўных.
Гэты праект, мэтай якога з’яўляецца абмеркаванне прынцыпаў устойлівага развіцця грамадства і распаўсюджанне ведаў пра экалагічныя праблемы, стартаваў яшчэ ў 2010 годзе і за 5 год ахапіў цэлы шэраг краінаў, у тым ліку Беларусь, Швецыю, Грэцыю, Паўднёвую Афрыку, Бразілію і іншыя.
У гэтым годзе амбіцыёзны праект Шведскага інстытута фінальна рэалізаваўся ў буйной публікацыі — альбоме, які з’яднаў мастацкія і дыскурсіўныя разважанні прафесіяналаў розных краінаў свету.
У альбом патрапілі таксама і працы 6-ці беларускіх мастакоў: Рамана Сустава, Кацярыны Марціновіч, Алега Карповіча, Вольгі Сазыкінай, Сяргея Волкава і Антаніны Слабодчыкавай.
У рамках міжнароднага праекта «Сам-насам з кліматам» і з нагоды выпуску альбома ў Нацыянальным цэнтры сучасных мастацтваў Рэспублікі Беларусь пройдзе аднайменная шведска-беларуская выстава.
Выстава складаецца з дзвюх частак, уключае творы мясцовых мастакоў і шведскіх карыкатурыстаў і ўяўляе сабой візуальны шэраг экспазіцыі, якая даступным спосабам уздымае пытанні змены клімату перад гледачом.
У рамках выставы адбудуцца два майстар-класы.
Майстар-клас Антаніны Слабодчыкавай «Змест. Канструкцыя. Выява і Сэнс» прадэманструе спосабы канструявання сэнсу праз канструяванне выявы. Удзельнікі папрацуюць у тэхніцы калажу. Знакамітая беларуская мастачка працуе ў розных медыя (відэа, інсталяцыя, аб’ект), у пабудове сваіх інсталяцый і аб’ектаў выкарыстоўвае стратэгію калажу і рэдзі-мэйду.
Другі майстар-клас «Глыбінная экалогія» пройдзе пад кіраўніцтвам Вольгі Сазыкінай. Аўтарка працуе з эка-матэряламі, а таксама з медытатыўнымі практыкамі. Падчас майстар-класа ўдзельнікі пазнаёмяцца з творчасцю знакамітага і ўплывовага беларускага аўтара і папрацуюць з цікавымі тэхнікамі стварэння мастацкага аб’екта.
Майстар-класы адбудуцца 11 і 20 кастрычніка ў Нацыянальным цэнтры сучасных мастацтваў (пр-т Незалежнасці, 47) а 17-ай гадзіне. Уваход вольны. Папярэдняя рэгістрацыя па тэлефоне: 280-56-08.
Выстава будзе адкрытая для наведнікаў з 7 па 22 кастрычніка 2016 г.
Тэлефон для даведак: 280-56-08
