Ураган «Мэцью», які бушуе ў Атлантыцы, у ЗША забраў жыцці 17 чалавек, паведамляюць інфармагенцтвы.
Ахвярамі стыхіі сталі жыхары трох штатаў — Джорджыя, Фларыда і Паўночная Караліна. Цяпер «Мэцью» аслабеў да ўзроўню цыклона. Федэральны ўрад абяцае штатам, якія пацярпелі ад урагану, аказаць дапамогу для кампенсацыі нанесенай шкоды.
Па прагнозах спецыялістаў, «Мэцью» працягне губляць сваю сілу і будзе рухацца ў бок акіяна, аддаляючыся ад атлантычнага ўзбярэжжа ЗША.
На гэтым тыдні ўраган «Мэцью», які стаў самым моцным у Атлантычным акіяне з 2007 года, лютаваў на выспах Карыбскага басейна. Больш за ўсіх пацярпелі жыхары Гаіці, дзе загінула каля 900 чалавек, разбураныя тысячы дамоў. Матэрыяльная шкода вылічаецца мільярдамі даляраў.
