Сусветная арганізацыя аховы здароўя выказала падтрымку краінам, якія ўводзяць дадатковы «цукровы падатак» на салодкія прадукты і напоі.
АР
Згодна з апублікаваным новым дакладам СААЗ, павелічэнне кошту на салодкія напоі нават на 20% прыводзіць да зніжэння іх спажывання і садзейнічае пераходу насельніцтва на больш здаровае харчаванне ў цэлым.
Раней Сусветная арганізацыя аховы здароўя проста выступала з рэкамендацыямі паменшыць спажыванне цукру, устрымліваючыся пры гэтым ад адкрытай падтрымкі падатковых мер.
Некаторыя краіны, у тым ліку Мексіка і Венгрыя, ужо ўвялі дадатковы падатак на салодкія прадукты і напоі. У наступным годзе аналагічны «цукровы падатак» уводзіць ПАР — першая сярод краін Афрыкі.
Зніжэнне спажывання так званых свабодных цукраў вядзе да памяншэння колькасці людзей, якія пакутуюць на атлусценне, дыябет і карыес, паказвае СААЗ.
Да свабодных цукраў адносяцца монацукрыды, такія як глюкоза і фруктоза, а таксама дыцукрыды, напрыклад, цукроза або сталовы цукар, дадаваныя ў харчовыя прадукты і напоі вытворцамі.
Свабодныя цукры таксама натуральным чынам утвараюцца ў прыродных умовах і прысутнічаюць у мёдзе, сіропах, і канцэнтратах фруктовых сокаў. СААЗ не лічыць небяспечным спажыванне натуральных цукраў, якімі багатыя садавіна, гародніна і малако.
Па словах доктара Франчэска Бранкі, дырэктара дэпартамента СААЗ па харчаванні для здароўя і развіцця, «з пункту гледжання пажыўнай каштоўнасці людзям у дыеце наогул не патрэбны цукар».
Бранка рэкамендуе абмяжоўваць спажыванне цукру такім чынам, каб яно не перавышала 10% ад сумарнага сутачнага энергаспажывання, а ў ідэале складала менш за 5%.
СААЗ адзначае, што да «цукровага падатку» і іншых фінансавых мер варта звяртацца толькі ў тым выпадку, «калі у прадуктаў і напояў з павышаным утрыманнем цукру ёсць больш здаровыя рынкавыя альтэрнатывы».
У дакладзе таксама гаворыцца пра тое, што субсідаванне продажаў свежых гародніны і садавіны з боку дзяржавы і, адпаведна, зніжэнне цэн на іх мае станоўчы эфект, паколькі людзі ў выніку ўключаюць у свой рацыён ўсё больш гародніны і садавіны, а іх дыета становіцца больш здаровай.
Эксперты СААЗ мяркуюць, што аналагічныя падатковыя меры тэарэтычна могуць таксама быць эфектыўныя для зніжэння спажывання прадуктаў, якія маюць высокае ўтрыманне насычаных тлушчаў, транстлушчаў і солі.