12.10.2016 / 19:15

Першае месца прэміі Гедройца атрымаў Макс Шчур за кнігу «Завяршыць гештальт» 11

Прэмія Гедройца прысуджаецца штогод за найлепшую кнігу, напісаную на беларускай мове, у жанрах «мастацкая проза» і «эсэістыка».

Ганаровы старшыня журы Конрад Паўлік і прадстаўнікі «Ідэя Банка» Артур Кубінскі і Мікалай Дубавец аб'яўляюць імя пераможцы. Сёлета ім стаў Макс Шчур. На цырымоніі ён не прысутнічае, паколькі знаходзіцца ў Чэхіі.

20:55

Першае месца прэміі ў Макса Шчура. Чэк, эквівалентны 5000 еўра, дастаецца яму.

Хто такі Макс Шчур і чаму яго ніхто не бачыў

Валянцін Акудовіч: «Макс Шчур — неблагі выбар»

20:50

Другое месца агучвае старшыня Саюза беларускіх пісьменнікаў Барыс Пятровіч. 

Узнагароду прысуджаюць Альгерду Бахарэвічу. Ён адправіцца на шведскі востраў Готланд.

20:45

Трэцяе месца аб'яўляе Уладзімір Арлоў. Імя пісьменніка напісана ў канверце, які ён трымае ў руках.

Трэцяе месца ў Андрэя Адамовіча за кнігу «Таўсьціла і лешч». Андрэй атрымлівае ў падарунак двухтыднёвы творчы адпачынак у Берлінскім літаратурным калёквіуме.

Андрэй Адамовіч: «Я паехаў у Вільню, сеў і напісаў кнігу за дзесяць дзён»

Пісьменнікі, намінаваныя на прэмію, і сябры журы.

20:25

Усе пісьменнікі шорт-ліста, альбо іх прадстаўнікі, атрымалі дыпломы. На сцэне зноў гурт Shuma.

Ужо зусім хутка назавуць імёны пераможцаў.

На цырымоніі не прысутнічаюць Альгерд Бахарэвіч, Алесь Пашкевіч і Макс Шчур.

19:45

Гучаць урыўкі з намінаваных твораў. У запісе — галасы акцёраў Купалаўскага тэатра Алеся Малчанава і Алены Сідаравай. Ужывую ў зале чытае акцёр Купалаўскага Раман Падаляка.

19:25

Старшыня беларускага ПЭН-цэнтра Андрэй Хадановіч аб'яўляе, што распачатая пятая цырымонія ўзнагароджання пераможцаў прэміі Гедройца.

«З аднаго боку, прэмія створаная, каб ушанаваць памяць Ежы Гедройца, які 110 гадоў таму нарадзіўся ў Мінску. З іншага, прэмія — прапаганда беларускай літаратуры ў Польшчы і Беларусі. Мусіць быць вера пісьменніка ў тое, што калі ён нешта робіць, камусьці гэта патрэбна. Прэміі дапамагаюць сустрэцца аўтару з чытачом, з польскім перакладчыкам», — кажа Андрэй Хадановіч.

Слова бярэ ганаровы старшыня журы — Надзвычайны і Паўнамоцны Пасол Рэспублікі Польшча ў Рэспубліцы Беларусь Конрад Паўлік.

«Ідэя прэміі ў тым, каб стымуляваць беларускае літаратурнае асяроддзе развіцца. І гэта прыносіць свае вынікі, таму што бачны росквіт беларускай творчасці. З'яўляюцца кнігі важныя і вартыя ўвагі. Я перакананы, што сёлетнія лаўрэаты цалкам заслужылі гэтае званне. Хачу падзякаваць усім удзельнікам за іх вялікую працу. Вы ўсе — пераможцы. Трэба мець адвагу, каб удзельнічаць у такім конкурсе як гэты, — сказаў Кондрад Паўлік.

Спявае гурт Shuma.

19:15

У зале гатэля «Рэнесанс», дзе сёння агучаць пераможцаў, больш за 100 чалавек — пісьменнікі, журы, госці. 

Адкрывае цырымонію музычны гурт Shuma, які ўдала спалучае архаічныя беларускія спевы і сучасную электронную музыку.

***

Сёлета ў шорт-ліст Прэміі імя Ежы Гедройца трапілі кнігі:

  • «Таўсціла і лешч» Андрэя Адамовіча
  • «Прачнуцца ранкам у сваёй краіне» Валянціна Акудовіча
  • «Белая муха, забойца мужчын» Альгерда Бахарэвіча
  • «Рух» Алеся Пашкевіча
  • «Шмат Чэслава Мілаша, крыху Элвіса Прэслі» Тані Скарынкінай
  • «Завяршыць гештальт» Макса Шчура

У журы прэміі сёлета ўвайшлі Ігар Бабкоў, Сяргей Дубавец, Людміла Рублеўская і Ганна Янкута — з беларускага боку.

Анджэй Бжэзецкі і Малгажата Ноцунь — з польскага боку.

Ганаровы старшыня журы — Надзвычайны і Паўнамоцны Пасол Рэспублікі Польшча ў Рэспубліцы Беларусь Конрад Паўлік.

***

Прэмія імя Ежы Гедройца ўручаецца ад 2012 года.

Раней яе атрымлівалі:

  • Павел Касцюкевіч — «Зборная РБ па негалоўных відах спорту» (2012)
  • Уладзімір Някляеў — «Аўтамат з газіроўкай з сіропам і без» (2013)
  • Ігар Бабкоў — «Хвілінка: Тры гісторыі» (2014)
  • Віктар Казько — «Час збіраць косці» (2015)

Настасся Роўда, фота Сяргея Гудзіліна

0
Šarkoŭski pan / Адказаць
12.10.2016 / 20:07
Стаўлю на Акудовіча.
0
Тутэйшы чытач / Адказаць
12.10.2016 / 20:24
Любы чалавек, які стварае па-беларуску, варты ўзнагарод і павагі. Найлепшыя пажаданні ўсім намінантам.
0
Мікола / Адказаць
12.10.2016 / 20:37
Šarkoŭski pan, Акудовіча па статусу "уважаць", Бахарэвіч зноў будзе нэрвова кусаць локці.
Паказаць усе каментары/ 11 /
Каб пакінуць каментар, калі ласка, актывуйце JavaScript у наладах свайго браўзеру