Кандыдат у прэзідэнты ЗША ад Рэспубліканскай партыі Дональд Трамп назваў заявы некалькіх жанчын, якія абвінавацілі яго ў сэксуальных дамаганнях, «адкрытай хлуснёй».
Getty
Па словах Трампа, у хуткім часе ён прадставіць сведчанні, якія даказваюць безгрунтоўнасць абвінавачванняў у яго адрас.
Дональд Трамп лічыць, што падобныя абвінавачванні — гэта «скаардынаваная зламысная атака» з боку СМІ, якая з'яўляецца часткай перадвыбарчай кампаніі Хілары Клінтан, яго суперніцы ў барацьбе за прэзідэнцкае крэсла.
Раней у артыкуле газеты New York Times былі прыведзеныя аповеды двух жанчын аб сэксуальных дамаганнях да іх з боку Дональда Трампа. Услед за гэтай публікацыяй сталі з'яўляцца новыя паведамленні з падобнымі абвінавачваннямі. Журналіст выдання People напісала пра тое, як у 2005 годзе Трамп гвалтоўна спрабаваў яе пацалаваць, калі яна прыйшла браць інтэрв'ю ў яго і яго жонкі.
Яшчэ некалькі жанчын таксама распавялі СМІ пра непрыстойныя паводзіны мільярдэра.
У мінулую пятніцу журналісты апублікавалі прыватны відэазапіс 2005 года, на якім Трамп дапускае рэмаркі адносна прыставанняў да жанчын, што многіх абурыла.
Па сцвярджэнні самога бізнэсмена, гэта была «звычайная мужчынская балбатня ў распранальні», і ў жыцці ён бы ніколі не дазволіў сабе нічога падобнага.
