У пакістанскім Пешавары арыштаваная афганская жанчына, чый здымак трапіў на вокладку National Geographic ў 1985 годзе і стаў самай знакамітай фатаграфіяй за ўвесь час існавання часопіса, паведамляе ВВС.
Getty
Шарбат Гула, якой цяпер каля 40 гадоў, была арыштаваная пакістанскімі спецслужбамі, якія высветлілі, што яна пражывае ў краіне з падробленымі дакументамі.
Пакістанскія ўлады западозрылі жанчыну ў незаконным пражыванні ў краіне яшчэ ў пачатку мінулага года, калі ў прэсе была апублікаваная яе фатаграфія з пакістанскага пашпарта.
Таксама паведамлялася, што пакістанскія пашпарты былі выяўленыя ў двух мужчын, якія называлі сябе сынамі Шарбат Гулы.
Калі віна жанчыны пацвердзіцца, ёй можа пагражаць да 14 гадоў турмы і буйны штраф.
Фотаздымак Шарбат Гулы з'явіўся на вокладцы National Geographic у чэрвені 1985 года, калі ёй было каля 12 гадоў. Здымак быў зроблены амерыканскім фотарэпарцёрам Стывам Макары ў лагеры афганскіх бежанцаў на мяжы з Пакістанам.
Праца Макары хутка атрымала неймаверны поспех ва ўсім свеце і стала самай знакамітай фатаграфіяй за ўвесь час існавання часопіса. Некаторыя крытыкі параўноўвалі яе з Монай Лізай Леанарда да Вінчы па ўзроўні ўздзеяння на гледача.
Асобу дзяўчынкі з вокладкі удалося выявіць толькі ў 2002 годзе, калі каманда National Geographic спецыяльна прыехала ў Афганістан на яе пошукі. Тады ж Макары зняў яшчэ адзін яе фотапартрэт.
