velcom узяўся за прасоўванне сучаснай беларускай літаратуры
Новы сацыяльны праект кампаніі — Movabox.
У розных кавярнях і арт-прасторах Мінска і іншых гарадоў краіны з’явяцца адмысловыя скрыні з самымі рознымі беларускамоўнымі кнігамі нашых сучаснікаў. Калі ўбачыце такі мовабокс, смела бярыце адтуль штосьці пачытаць, толькі потым не забудзьцеся вярнуць назад.
Кампанія абяцае сачыць за тым, каб боксы не пуставалі, і заклікае далучацца ўсіх ахвотных. Калі на вашых паліцах ёсць беларускамоўныя кнігі сучаснікаў, можаце пакідаць іх у боксах.
Але беларускамоўны буккросінг — толькі частка праекта.
Кампанія падрыхтавала адмысловыя мовабоксы тым, хто цікавіцца беларускай літаратурай. У іх схаваны твор і розныя рэчы-сімвалы, якія скіроўваюць да яго падзей і герояў. Такім чынам ажывілі чатыры кнігі і для кожнай вырабілі па 20 мовабоксаў.
Каб запісацца ў шэрагі ахвотных іх атрымаць, трэба ўсяго толькі прайсці тэст на сайце праекта. Цяпер далі старт розыгрышу першай кнігі-бокса і праз шэсць тыдняў абяруць 20 шчасліўчыкаў, якім яны дастануцца. Пасля пачнецца розыгрыш наступнага твора.
Першы мовабокс створаны па твору Людмілы Рублеўскай «Авантуры студыёзуса Вырвіча». Гэта адна з частак серыі пра падарожжы і прыгоды Пранціша Вырвіча ў жанры гістарычнага фэнтэзі.
Пісьменніца да апошняга не ведала, што апынецца ў мовабоксе. Дазналася яна толькі на прэзентацыі праекта, якая прайшла 27 кастрычніка.
«Калі вы пройдзеце тэст, у якім даведаецеся, які вы герой твора, то трэба ж будзе прачытаць, што Рублеўская напісала менавіта пра вас, пра вашага персанажа, — сказала Людміла і найперш дастала са скрыні сам твор. — А гэта што ў нас? Магічны крышталь, які можна вырошчваць. Вы нібыта патрапіце ў майстэрню Баўтрамея Лёдніка. Акрамя таго, што ён доктар, ён яшчэ і алхімік. Лёднік не толькі здабываў філасофскі камень, але таксама займаўся вырошчваннем камянёў-крышталяў. У кнізе мае героі трапляюць у Англію, дзе іх абкрадаюць, і яны думаюць, як ім здабыць грошы, якія ім проста неабходныя. Спадарожнікі прапаноўваюць Баўтрамею Лёдніку заняцца вырошчваннем каштоўных камянёў. І вось вы зможаце дома таксама гэтым заняцца».
Далей Людміла дастала мяшэчак з манеткай. І патлумачыла, у чым яго незвычайнасць.
«Калі мае героі адплываюць у Англію з Гданьска, там сустракаецца фантан Няптуна. Па звычаі, каб марское падарожжа ўдалося, трэба туды кінуць манетку. А мой Баўтрамей Лёднік дужа прагрэсіўны доктар і змагаецца з забабонамі. Ён не дае Пранцішу Вырвічу кінуць манетку. У рэшце рэшт іх карабель трапляе ў страшэнны шторм, і яны ледзьве выратоўваюцца. Вось цяпер у вас будзе такая манетка, і вы зможаце кінуць яе не толькі ў фантан Гданьска, а ў любы фантан, рэчку ці возера. Туды, куды хочаце вярнуцца», — сказала пісьменніца.
Далей яна дастала са скрынкі карту падарожжаў герояў з налепкамі, каб можна было не толькі прачытаць, дзе яны былі, але і прасачыць па карце. Пасля — рэцэпт верашчакі, стравы, якая ўвайшла ў моду ў 18 стагоддзі і якую елі героі твору. Тут жа ў скрынцы таксама адшукаўся магніцік з аднаго з гарадоў, дзе апынуліся героі. Апошнім Людміла дастала нататнік з чорнымі старонкамі і ручку.
«Гэта, канечне, самая неабходная рэч для герояў, якія жывуць у свеце алхіміі і містыкі. Нататнікаў у рамане ажно некалькі. Адзін нататнік Пранціш Вырвіч атрымаў у спадчыну ад свайго сябра, які загінуў. Канечне, Баўтрамей Лёднік таксама не можа абысціся без нататніка. Вы можаце пачаць запісваць сюды пачутыя незвычайныя містычныя гісторыі», — прапанавала Рублеўская.
На сустрэчы выступіў таксама настаўнік праекта «Чытаем па-беларуску з velcom», вядомы падарожнік Юры Жыгамонт.
«Мы ездзім па беларускіх школах, па гарадах і мястэчках. Думаем, што пяройдзем і да беларускіх вёсак. Расказваем дзецям пра беларускую літаратуру, беларускіх пісьменнікаў. Мы працуем з дзеткамі, якія ходзяць у першы, другі, трэці клас, у іх толькі пачынаюцца ўрокі ў школе па беларускай мове і літаратуры. У іх вочкі вельмі гараць, калі пачынаеш расказваць пра нашых беларускіх пісьменнікаў, пра тое, што яны пішуць. І менавіта з гэтага праекта нарадзіўся Movabox. Мы сталі натхняльнікамі гэтага праекта, і я думаю, ён гэтаксама будзе карыстацца поспехам», — выказаў спадзеў Юры.
Velcom мае надзею, што Movabox дапаможа змяніць уяўленне беларусаў пра сучасную літаратуру. Паказаць, што нашы пісьменнікі пішуць далёка не толькі пра вёску і вайну.
Цяпер чытаюць
Кіраўнік Ліды заклікаў сілавікоў не спыняць палітычныя рэпрэсіі11
Каментары