31 кастрычніка ў кнігарні «Ў» адбудзецца прэзэнтацыя кнігі паэзіі «Доказательства движения». Яе аўтар — Андрэй Бастунец.
У 2011 годзе Андрэй запісаў альбом пад такой самай назвай — «Доказательства движения», дзе выконваў пад гітару песьні на свае вершы і сваю ж музыку, крыху пазьней яшчэ адзін. І вось сёлета выйшла першая паэтычная кніга старшыні Беларускай асацыяцыі журналістаў, юрыста па спэцыяльнасьці Андрэя Бастунца. Але ўключае кніга пяць вершаваных зборнікаў. Вершы гэтыя пісаліся з 1990-х і да сёньняшняга дня.
— Андрэй, цяпер вы старшыня БАЖ, у вас яшчэ некалькі пасадаў, шмат працы, абавязкаў. Ці пішацца цяпер, ці ўзьнікае жаданьне і натхненьне пісаць вершы, ці ёсьць час на паэзію?
— Ня вельмі… І справа не ў пасадах, проста няма часу спыніцца. Нядаўна езьдзіў у Нямеччыну амаль на тыдзень, паездка была працоўная, падчас пераездаў некалькі вершай напісаў. І гэта ўсё, чым я магу за апошнія пару гадоў пахваліцца.
— То бок новай вашай кнігі чакаць ня хутка?
— Гэта кніжка чакала 20 гадоў. Магчыма, праз наступныя 20 і другую паэтычную выдам. Але ў мяне падрыхтаваная кніга прозы, якую я спадзяюся выдаць у бліжэйшым часе. Гэта раман. Называецца вельмі проста — «Гісторыя». Складана коратка распавесьці, пра што ён. Пра магчымасьць і немагчымасьць каханьня, скажам так.
— Але вернемся да паэтычнага зборніка, які вы прэзэнтуеце ў панядзелак. Спачатку выйшаў адзін дыск з вашымі песьнямі, потым другі. У паэтычны зборнік увайшлі тыя ж самыя вершы?
— Насамрэч, у кнігу я амаль не ўключаў тыя вершы, на якія напісаныя песьні, бо гэта ўсё ж такі два розныя жанры. І нават калі ў мяне некаторыя тэксты, якія сталі песьнямі, і маглі б лічыцца вершамі, у кнігу я ўсё ж такі пераважна ўключыў іншыя творы. Хоць кніга называецца гэтаксама, як і першы мой альбом — «Доказательства движения».
— Андрэй, мяркуючы і па песьнях, і па вершах, тэксты ў вас такія філязофскія, вы ствараеце ўражаньне чалавека самотнага, які ідзе па сьвеце адзін, ён у пошуку, шмат разважае, вагаецца, сумняецца. Вы насамрэч такі інтравэрт, ці гэта ўсё ж паэтычны вобраз?
— Мне цяжка адказаць на гэтае пытаньне. Падаецца, звонку відней.
Прэзэнтацыя кнігі выбраных вершаў «Доказы руху» Андрэя Бастунца адбудзецца 31 кастрычніка ў кнігарні «ЛогвінаЎ» (праспэкт Незалежнасьці, 37а). Пачатак а 19-й.
У імпрэзе возьмуць удзел культуроляг Максім Жбанкоў, паэтка Сабіна Брыло, пісьменьнік Сяргей Лапцэвіч.
