Суддзя Валерый Есьман вынес прысуд падлетку, які абвінавачваўся ў нанясенні лёгкіх цялесных пашкоджанняў былому супрацоўніку АМАП Алегу Шарко.
Нагадаем, што да суда прывяла складаная гісторыя. Падлетак заявіў, што пасля затрымання яго з сябрам жорстка збілі ў аўтазаку, пагражалі сэксуальным гвалтам і нават справілі на іх галовы натуральную патрэбу. Прычым экспертыза сапраўды знайшла ў валасах падлеткаў сляды мачы.
Былы амапавец Алег Шарко.
Але складнікаў злачынства ў дзеяннях амапаўцаў не знайшлі, падлетка ж пакаралі ўмоўным тэрмінам. Той толькі ў слязах сказаў, што вынес для сябе ўрок — нельга распіваць алкаголь у публічных месцах.
У гэтай гісторыі выклікае грамадскі інтарэс не толькі вердыкт суддзі, але і алгарытмы паводзін сілавікоў.
«Наша Ніва» праглядзела старонку былога АМАПаўца УКантакце — той яе ўжо падчысціў, выдаліўшы большасць фота, але на відэа забыўся, ці не захацеў.
А з відэа таксама можна зрабіць пэўныя высновы.
Так, у відэазапісах на старонцы Шарко дамінуюць тэма Чачні, а таксама «Русь»: «Героі Русі», «Цвярозая Русь», гурт «Русь» і г.д.
Але тыя відэа Шарко проста ў кагосьці ўбачыў і «расшарыў».
А што ён дадаваў самастойна?
Так, у 2013 годзе ён дадаў відэа гурту «Банда Москвы» «Віват, Россія».
У каментарыі пад відэа былы амапавец уласнаручна напісаў 1488!
1488 — гэта лічбавая абрэвіятура неанацыстаў, у якой 14 — колькасць словаў у англамоўнай фразе «Мы мусім абараняць нашую расу дзеля будучыні белых дзяцей», а 88 — падвоенае «H» — восьмая літара лацінскага алфавіту, што азначае зашыфраванае «Heil Hitler».
«Фармат 18» — гэта расійская неанацысцкая арганізацыя, створаная ў 2005 Максімам Марцінкевічам (Цесаком).
Аб чым тое відэа, што натхніла Шарка на такі подпіс? «Наша Ніва» не можа змясціць яго праз непрыхаваную прапаганду гвалту, неанацызму і распальвання варожасці на нацыянальнай глебе.
У відэа пад музыку гучаць прымітыўныя ідэалагічныя заклікі неанацыстаў.
Гэта суправаджаецца відэашэрагам з кадрамі выкідвання правай рукі (Хайль Гітлер), калектыўнага збіцця невядомых, нападзенняў са спіны на людзей і, уласна, партрэтам Гітлера і Расійскім імперскім сцягам.
І гэта не адзінае відэа гэтага гурту ў відэазапісах Шарко.
Незразумела, якім чынам Шарко ўвогуле трапіў у міліцыю і дзе ён заразіўся чалавеканенавісніцкімі ідэямі. Якая тут роля Акадэміі міліцыі, і чаму аддзел кадраў не здолеў ідэнтыфікаваць неанацысцкія схільнасці своечасова?
Органы ўнутраных спраў пакуль ніяк не пракаментавалі прычыны звальнення Шарко.
