 |
Першым фіналістам Эўра-2008 стала ў сераду каманда Яхіма Лёва. Яна здабыла валявую перамогу над туркамі – 3:2. Усё вырашыў гол Лама на 90-й хвіліне.
На трыбунах стадыёну ў Базэлі прысутнічалі канцлерка Нямеччыны Ангела Мэркель, прэзыдэнт Швайцарскай канфэдэрацыі, а таксама прэзыдэнт Турцыі Абдула Гюль. Стадыён таксама быў падзелены амаль пароўну на «белы» (нямецкі) і «чырвоны» (турэцкі) сэктары. Немцы лічыліся бяспрэчнымі фаварытамі, але туркі былі ня супраць паднесьці чарговую сэнсацыю.
Турэцкая зборная зрабіла стаўку на бліцкрыг у пачатку першага тайму. Каманда Фаціха Тэрыма на працягу першых дваццаці хвілін зьдзівіла сваёй мабілізаванасьцю, рашучасьцю і настроем на гульню.
Туркі не саромеліся біць з самых розных дыстанцый. Білі калі трэба і калі ня трэба. На трынаццатай хвіліне Казім Казім - адзін з найлепшых у матчы - наймацнейшым ударам трапіў у папярэчыну. Празь дзевяць хвілін пасьля выстралу Сэміха мяч зноў трапіў у арматуру брамы, але на гэты раз прадмет гульні ўдала адскочыў да Ўгура Барала, які перайграў Лемана – 1:0.
Аднак немцы аказаліся не такімі простымі. Нападнікі ў іх сапраўды выдатныя, а Балак умела дырыжыраваў атакамі. Ужо праз чатыры хвіліны ўлюбёнец бундэсканцлерыны Бастыян Швайнштайгер удала замкнуў флянгавую перадачу Лукаша Падольскага – 1:1.
Туркі ўсё адно працягвалі ісьці наперад. Бачачы, што брамнік Енс Леман ня самае моцнае зьвяно «бундэсьцім», не спыняліся шматлікія ўдары па ягоных варотах. Але першы тайм так і скончыўся нічыёй.
Ці не палову другога тайму аматары футболу ва ўсім сьвеце не маглі назіраць за гульнёй праз перашкоды сыгналу. Магутная навальніца над Венай перабівала сувязь. Таму і ня ўбачылі другі гол немцаў, калі Рушцю Рэчбэр памыліўся на выхадзе, а Клозэ заставалася толькі падставіць галаву – 2:1.
Але памятаючы пра ранейшыя подзьвігі туркаў, быць упэўненым у выніку матча не выпадала. І «чырвоныя» зноў пацьвердзілі рэнамэ каманды, якая б’ецца да апошняга. За чатыры хвіліны да канца матчу той самы Сэміх Шэнтурк, пасьля ўдару якога дадому паехалі харваты, лік зноў адыграў. Лікаваньне ў турэцкім сэктары і сум у нямецкім.
Высьветлілася ж, што з псыхалёгіяй у зборнай Нямеччыны ўсё добра. Казім, той самы Казім, нейкім няшчасьцем, нейкім супадзеньнем падвярнуў нагу. Немцы падхапілі мяч каля самай штрафной. Спрытны Філіп Лам б'е - і мяч цэліць у блізкі вугал варотаў Рушцю – 3:2.
Немцы аб’ектыўна былі мацнейшымі, але і туркі могуць вяртацца на радзіму як героі. Яны біліся і дзівілі. На гэтым Эўра яны зрабілі ўсё, што маглі, а то і болей.
Супернік немцаў па фінале вызначыцца заўтра ў матчы Расея – Гішпанія. Трансьляцыя на тэлеканале АНТ а 21:30. Саміт ЭС-Расея ў Ханты-Мансійску 26-27 чэрвеня пройдзе ў цёплай атмасфэры.
