У Руандзе запусцілі нацыянальную сістэму дастаўкі крыві пры дапамозе дронаў. Беспілотнікі, спраектаваныя каліфарнійскім стартапам Zipline, пачнуць перасылаць кроў да 21 станцыі пералівання ў Заходняй Руандзе, дзе дарогі і медыцынская інфраструктура жадаюць лепшага. Урад Руанды будзе плаціць амерыканскай кампаніі за кожную дастаўку. Таму можна лічыць, што гэта першая ў свеце рэгулярная беспілотная камерцыйная служба дастаўкі, паведамляе BBC.
Zipline і руандыйскі ўрад анансавалі пачатак супрацоўніцтва яшчэ на пачатку года. Некалькі месяцаў яны патрацілі на тэставанне сістэмы ў рэгіёне Муганга.
flyzipline.com
Служба дастаўкі складаецца з 15 дронаў Zips, якія могуць лятаць на адлегласць да 150 кіламетраў у два бакі і пераносіць да 1,5 кілаграма крыві. Шпіталі могуць замаўляць кроў праз тэкставыя паведамленні, і ўжо праз 15 хвілін яна спусціцца з дрона на парашуце.
flyzipline.com
Тэхналогіі дастаўкі дронамі актыўна развіваюцца ў ЗША, але іх укараненне тармозіцца тым, што ўлады не паспелі распрацаваць заканадаўства, якое рэгулявала б гэтую новую сферу. Руанда вырашыла скарыстацца сітуацыяй, адаптавала законы і запрасіла да сябе амерыканскія стартапы, якія займаюцца вытворчасцю дронаў. Да 2020 года Руанда плануе пабудаваць спецыяльны аэрапорт для дронаў.
Zipline сцвярджае, што сабекошт кожнай перасылкі крыві дронам прыкладна адпавядае кошту аўтамабільнай перасылкі, але дрон дазваляе значна ашчадзіць час, што крытычна важна пры дастаўцы крыві.
На сёння дастаўка крыві можа ажыццяўляцца на тэрыторыі плошчай 18 тысяч квадратных кіламетраў, на якой жыве каля 7 мільёнаў руандыйцаў. Налета Zipline плануе ажыццяўляць дастаўку крыві і ва Усходнюю Руанду. Таксама амерыканскі стартап супрацоўнічае з фондамі Біла Гейтса, каб у будучым сістэма дронаў магла, акрамя крыві, дастаўляць вакцыны і іншыя медыкаменты.
«Не думайце, што мы збіраемся з дапамогай дронаў дастаўляць толькі кроў. Гэта было б гэтак жа абсурдна, як будаваць у Руандзе аўтамагістралі, на якіх маглі б ездзіць толькі ружовыя аўтамабілі. Канечне, гэтую інфраструктуру ў будучыні можна будзе выкарыстоўваць для розных рэчаў, некаторыя з якіх мы можам прадказаць, а некаторыя — не», — адзначыў кіраўнік Zipline Келер Рынаўда (Keller Rinaudo).
У 2017 годзе амерыканскі стартап пачне дасылаць кроў і медыкаменты ў аддаленыя і вясковыя раёны штатаў Мэрыленд, Нявада і Вашынгтон. Амерыканскія кампаніі Matternet і Flirtey таксама плануюць запусціць падобную службу дастаўкі крыві і медыкаментаў дронамі.
