У судзе.
7 лiстапада падчас акцыi пратэсту супраць новага помнiка Ленiну каля Трактарнага завода Змiцер Дашкевiч разам са сваiмi паплечнiкамi быў затрыманы. Па словах Змітра, па дарозе ў РАУС супрацоўнiкi АМАП жорстка збiвалi яго i здзекавалiся. На Дашкевіча склалі тры пратаколы: за «ўдзел у несанкцыянаванай акцыі», за «хуліганства» і за «непадпарадкаванне міліцыі».
13:00
Прысуд: Зміцер Дашкевіч атрымаў штраф у 50 базавых (1050 рублёў).
Суддзя прызнала вінаватым Дашкевіча ў паўторным на працягу года ўдзеле ў несанкцыянаваным масавым мерапрыемстве (артыкул 23.34 КаАП РБ) і непадпарадкаванні патрабаванням міліцыі (артыкул 23.4).
Зміцер са сваімі паплечнікамі пакінуў залу суда да абвяшчэння прысуду, каб трапіць на суд над Уладзімірам Кондрусем.
11:10
Паказанні дае Павел Яфрэмаў, камандзір адзялення АМАП.
«Наўмысна ўносіў паніку ў натоўп. Мы не ўмешваліся да апошняга, але калі пачалася бойка, вырашылі яго затрымаць», — зачытвае з нататніка Ефрэмаў.
Ён кажа, што яны выратавалі Змітра, бо яго б там збілі.
«У нас не было іншага выйсця. Мы да апошняга думалі, што ўсё абыдзецца, але калі б мы стаялі ў баку, невядома, што было б. Мы выратавалі ваша жыццё. Вы прыйшлі, выказалі свой пункт гледжання, але вы стварылі паніку. Калі на вас хтосьці накінуўся, яго трэба пакараць, тут я з вамі згодны», — працягвае Ефрэмаў.
Дашкевіч:
«Я сёння прыйшоў дзеля аднаго — паглядзець на вас і вашых сяброў, якія любяць смактаць дубінкі. Што было ў аўтобусе?»
Ефрэмаў:
«Я сядзеў наперадзе, Зміцер быў ззаду. Я ўжо не памятаю і не бачыў, ці была нейкая патасоўка ў аўтамабілі па дарозе ў РАУС. Я Змітра ведаю даўно. Можа, я штосьці і бачыў, можа, і была перапалка славесная, але я гэтага не памятаю».
Дашкевіч:
«Таварыш Ефрэмаў у самых вычварэнскіх формах накідваўся на мяне. Фізічны гвалт у іх ужо перасякае мяжу».
Ефрэмаў:
«Мне не зразумела, па якіх маральна-псіхалагічных прычынах Зміцер кажа такія рэчы пра мяне. Калі б мы яго не выратавалі, то яго б забрала хуткая дапамога. І калі б я кагосьці збіваў, былі б вельмі цяжкія наступствы».
Дашкевіч падышоў да Ефрэмава, таму што яму «нязручна глядзець у патыліцу».
Зміцер яшчэ раз задаў пытанне, ці тыкаў ён дубінкай. Міліцыянт спытаў, ці разумее Зміцер, што значыць тыкаць дубінкай.
Дашкевіч: «Не, вы канкрэтна адкажыце: вы тыкалі дубінкай?»
Ефрэмаў: «Не».
Дашкевіч: «У мяне больш пытанняў да Ефрэмава няма».
Мужчына справа пад нумарам два — Павел Ефрэмаў. Па словах Змітра Дашкевіча, ён суваў яму дубінку і крычаў: «Смакчы!»
10:55
Выступае міліцыянт Андрэй Леонаў, які затрымліваў Дашкевіча. Па словах актывістаў, ён біў Рамана па шчоках.
«Дашкевіч спрабаваў справакаваць бойку. Я праводзіў затрыманне, каб спыніць масавыя беспарадкі. Калі я спрабаваў затрымаць Дашкевіча, ён схапіў мяне за форму», — гаворыць Леонаў. Ён кажа, што затрыманыя сядзелі на падлозе і крычалі «фашысты».
Зміцер заяўляе, што ў аўтобусе яго збівалі Леонаў і Ефрэмаў. Міліцыянт адмаўляе. Зміцер папярэджвае, што міліцыянт павінен мець на ўвазе адказнасць за ілжэсведчанне.
Андрэй Леонаў, які затрымліваў Дашкевіча.
10:40
«Як толькі покрыва з Леніна знялі, вось гэты таварыш (Зміцер — рэд.) выбег з расцяжкай і стаў крычаць. Гэта нонсанс, мы ў мірнай краіне жывем. Я была ў шоку», — дае паказанні начальнік бюро ідэалогіі трактарнага завода.
«Вы адкрываеце помнік тырану», — гаворыць Зміцер.
«Гэта наша тэрыторыя і наш помнік. Гэта наша гістарычная абарона», — кажа сведка.
«Пане Тамара, ці ведаеце вы, колькі трактароў на складзе стаіць, пакуль вы ставіце помнікі Леніну?» — пытаецца Зміцер.
10:30
Дае паказанні міліцыянт Сяргей Селін. Ён гаворыць, што былі крыкі «ганьба» і скокі ў бок помніка. Але не ведае, хто крычаў, бо не бачыў.
«Я ўзяў цытаты Леніна, а вы кажаце, што адбылася акцыя, якая не ўпісваецца ў асноўнае мерапрыемства», — адказвае Дашкевіч Селіну.
10:20
Сведкі Дашкевіча кажуць, што ў калідоры амапаўцы вучаць канспекты з паказаннямі, якія яны павінны даць.
«Мы прыйшлі на дазволенае гарвыканкамам мерапрыемства. Пасля пікетавання нас затрымалі. Калі нас прывезлі ў РАУС, Зміцер ужо ляжаў на падлозе і яго піналі», — гаворыць Сяргей Пальчэўскі.
«Нас пасадзілі ў сіні аўтобус, Дашкевіча паклалі на падлогу. Рамана Ганчарова білі па шчоках і пыталіся, колькі нам плацяць. Ефрэмаў падносіў дубінку да майго твару і пытаўся: ці ведаеш ты, што гэта такое?» — кажа Арцём Леўчанка.
Злева на фота супрацоўнік АМАП, які, па словах Леўчанкі, падносіў дубінку да яго твару.
Журналіста «Радыё Свабода» выправадзілі з залы суда праз здымку відэа.
10:10
Суддзя просіць пацвердзіць, ці быў Дашкевіч на акцыі. Зміцер распавядае, што проста вырашыў выказаць нязгоду, таму з сябрамі раздрукаваў цытаты Леніна і цягам некалькі хвілін праводзіў пікетаванне. Пасля некалькі прадстаўнікоў камуністычных партый накінуліся на яго, а затым супрацоўнікі АМАП панеслі яго ў аўтобус. Зміцер кажа, што хоча спытаць у амапаўцаў, для чаго яны збівалі яго ў аўтобусе.
Суд адмовіўся праглядаць відэазапіс, які знялі журналісты.
Зміцер Дашкевіч перад судовым пасяджэннем.
10:05
Дашкевіч хадайнічае, каб суд вёўся па-беларуску. Суддзя адмаўляе, паколькі ў краіне дзве дзяржаўныя мовы.
Суддзя зачытвае абвінавачванне. Дашкевіч кажа, што кепска разумее рускую мову, але гэта ўсё хлусня.
Дашкевіч далучае сведкаў Пальчэўскага і Леўчанку, якія могуць распавесці, як было насамрэч.
***
Па словах Змітра, 7 лістапада пасля затрымання на адкрыцці новага помніка Леніну па дарозе ў РАУС супрацоўнiкi АМАП збiвалi яго i здзекавалiся.
