23.11.2016 / 19:25

У Беларусі створаны банк ДНК элітных спартсменаў 7

Банк ДНК элітных спартсменаў створаны ў Беларусі. Пра гэта паведаміў галоўны вучоны сакратар Нацыянальнай акадэміі навук Беларусі, старшыня Беларускага таварыства генетыкаў і селекцыянераў Аляксандр Кільчэўскі сёння на III Міжнароднай навуковай канферэнцыі «Генетыка і біятэхналогія XXI стагоддзя: праблемы, дасягненні, перспектывы».

Аляксандр Кільчэўскі расказаў, што навукоўцы пратэсціравалі больш як 500 спартсменаў 30 нацыянальных каманд Беларусі.

ДНК-пашпартызацыю спартсменаў ажыццяўляюць у лабараторыі генетыкі чалавека, якая функцыянуе ў Інстытуце генетыкі і цыталогіі Нацыянальнай акадэміі навук. ДНК-пашпартызацыя праводзіцца па комплексе 20 асноўных генаў, што істотна ўплываюць на стан апорна-рухальнага апарату, вынослівасць, скорасць, сілу, адаптацыю да гіпаксіі, здольнасць да аднаўлення пасля фізічных нагрузак.

Цяпер распрацаваны праграмы адбору пачынаючых спартсменаў па спартыўных напрамках: скорасна-сілавым, які патрабуе вынослівасці, гульнявым і складанакардынацыйным, якія даюць магчымасць палепшыць спартыўны адбор і спецыялізацыю.

Распрацавана таксама сістэма генетычнага тэсціравання ў спорце, што ўключае ў сябе гены, якія дэтэрмінуюць высокія спартыўныя дасягненні, а таксама абумоўліваюць схільнасць да прафесійных паталогій. Генетычнае тэсціраванне спартсменаў дае магчымасць аптымізаваць трэніровачны працэс і карэкціраваць медыка-біялагічнае забеспячэнне атлетаў, што ў выніку садзейнічае павышэнню іх рэзультатыўнасці.

Акрамя таго, распрацавана ДНК-тэхналогія вызначэння ўзроўняў актыўнасці генаў, асацыіраваных з высокімі спартыўнымі дасягненнямі. Кантроль за дынамікай экспрэсіі генаў у адказ на фізічныя нагрузкі дае магчымасць своечасова карэкціраваць праграму трэніровак і істотна палепшыць рэалізацыю спартыўнага патэнцыялу спартсмена.

У НАН Беларусі 23-25 лістапада праходзіць III Міжнародная навуковая канферэнцыя «Генетыка і біятэхналогія XXI стагоддзя: праблемы, дасягненні, перспектывы». На форуме прадстаўлены вынікі сучасных генетычных і біятэхналагічных даследаванняў навукоўцаў Беларусі, Расіі, Украіны, Казахстана, Вялікабрытаніі (Шатландыя). Мерапрыемства арганізавана з мэтай абмену вопытам і аб'яднання навуковых патэнцыялаў навукоўцаў з розных краін для вырашэння прыярытэтных задач генетыкі і селекцыі. У час работы канферэнцыі прадугледжаны правядзенне 11-га з'езда Беларускага таварыства генетыкаў і селекцыянераў (БТГіС).

З'езд БТГіС і міжнародная навуковая канферэнцыя прымеркаваны да 115-годдзя з дня нараджэння акадэміка Антона Жэбрака. З яго імем звязваюць пачатак сур'ёзных генетычных даследаванняў у Беларусі. Работы навукоўца ў галіне аддаленай гібрыдызацыі пшаніцы і эксперыментальнай поліплаідыі, пачатыя ў 30-я гады мінулага стагоддзя ў Маскве і прадоўжаныя ў 50-я гады ў Акадэміі навук Беларускай ССР, былі першымі генетычнымі даследаваннямі ў рэспубліцы.

1
Ок / Адказаць
23.11.2016 / 19:36
Нахлебники на шее у народа
0
Йа / Адказаць
23.11.2016 / 19:59
Як лічыце, падобны банк спермы быў бы папулярным у Беларусі? Даю ідэю для стартапа. Мо Шыла прачытае... У яго прадпрымальніцкі дух.
0
дзюдзя / Адказаць
23.11.2016 / 20:29
Очынь наравіцца слова РЫЗУЛЬТАТ. Праўда хочацца спадзявацца, што працы ў гэтым накірунку прывядуць да дадатных, станоўчых вынікаў.
Паказаць усе каментары/ 7 /
Каб пакінуць каментар, калі ласка, актывуйце JavaScript у наладах свайго браўзеру