Дзяржаўная прэса апублікавала абноўленыя спісы матэрыялаў, які лічацца экстрэмісцкімі ў Беларусі. Сёлета ў спіс дадалося шмат чаго, звязанага з ультралевымі ці ультраправымі рухамі, а таксама з радыкальным ісламам.
У адзін шэраг з альбомам «Прэс-фота Беларусі 2011» і канцэртам «Салідарныя з Беларуссю» паўстануць, напрыклад, відэазапісы пад назвамі «Рытуальнае пакаранне праз павешанне» і «Скіны рэжуць чурку», артыкулы, прысвечаныя адмаўленню Халакосту, а таксама кніга Адольфа Гітлера «Майн Кампф».
Матэрыялаў, звязаных з апазіцыяй, у спіс не дадалося. Усе новыя пункты прысвечаныя радыкальным рухам. Гэта, па-першае, кнігі і відэа неанацысцкага кшталту. Таксама экстрэмісцкімі прызнаны шэраг суполак Укантакце з красамоўнымі назвамі, напрыклад — «Зіга-зага-ой-ой-ой» і гэтак далей. Акрамя таго экстрэмісцкімі матэрыяламі прызнаныя стыкеры і проста побытавыя рэчы з выявай фашысцкіх сімвалаў, такія як керамічныя талеркі і спражкі для рамянёў.
Экстрэмісцкімі прызналі і шэраг анархісцкіх сайтаў і суполак. Доступ да іх ужо закрыты.
Распаўсюджваць нельга і матэрыялы, звязаныя з радыкальным ісламам. Экстрэмісцкімі прызнаны спевы «чачэнскага барда» Цімура Муцураева, шэраг кніг і друкаваных матэрыялаў.
Таксама ў спіс увайшоў фэйкавы відэазапіс «Карателі батальона Азов распялі ополченца Донбасса на кресте». Акрамя таго ёсць і шэраг псеўданавуковых кніг і відэа, прысвечаных «Вялікай Русі» і славянскаму паганству. Напрыклад, кнігу «От руссов звездных до оскверненных русскіх» распаўсюджваць ужо забаронена.
Экстрэмісцкай лічыцца і кніга «Православным о православіі. Популярное богословіе, ілі богословіе для чайніков». Яе аўтар, гамяльчук Сяргей Нікалаенка, сцвярджае, што ў кнізе «разгледжаныя міфы і легенды, якія ўзніклі ў праваслаўі на працягу стагоддзяў, дадзена аб'ектыўная ацэнка сённяшняй сітуацыі ў Царкве».
Нікалаенка — святар рэфарматарскай Праваслаўнай Царквы Хрыста Збавіцеля, якую ўзначальвае былы святар Рускай праваслаўнай царквы Сяргей Жураўлёў. У Беларусі адзіны прыход царквы быў зарэгістраваны ў Гомелі як пяцідзясятніцкі. Летась ён сутыкнуўся з моцным ціскам з боку беларускіх уладаў, вернікам было забаронена збірацца на набажэнствы, у кватэры святара прайшоў ператрус, а сам ён быў аштрафаваны.
***
Нагадаем, што ў Беларусі існуе адміністратыўная адказнасць за выраб, распаўсюд, захоўванне экстрэмісцкіх матэрыялаў, выданне, захоўванне або перавозку з мэтай распаўсюджвання такой інфармацыйнай прадукцыі. Караецца гэта штрафамі, да 20 базавых велічынь давядзецца заплаціць фізічным асобам, 20—50 базавых велічынь — індывідуальным прадпрымальнікам, ад 50 да 200 базавых велічынь — юрыдычным асобам.
