Інвестыцыйны фонд Larnabel Enterprises, заснаваны сям'ёй расійскага мільярдэра Міхаіла Гуцэрыева, і інвесткампаніі VP Capital, створанай беларускім бізнэсмэнам Віктарам Пракапенем, абвясцілі пра пачатак рэалізацыі сумесных праектаў у шэрагу краін Еўропы. Пра гэта гаворыцца ў іх сумеснай заяве, што паступіла ў Tut.by.
Мэтай сумесных інвестыцый стануць перспектыўныя інавацыйныя праекты, звязаныя са стварэннем і прасоўваннем IT-прадуктаў на базе штучнага інтэлекту. Запланаваны аб'ём інвестыцый складзе больш за 100 мільёнаў даляраў.
Віктар Пракапеня мяркуе, што «новыя тэхналогіі штучнага інтэлекту ўжо ў бліжэйшыя 5 гадоў зменяць свет гэтак жа, як яго ў свой час змянілі мабільныя прылады і інтэрнэт». «Усе IT-праекты, якімі я займаўся на працягу апошніх гадоў, мелі ў сваёй аснове алгарытмы машыннага навучання. Я перакананы, што ў будучыні на гэтым шляху нас чакаюць вялікія дасягненні», — перакананы Пракапеня.
Старшыня савета дырэктараў фонду Larnabel Enterprises Міхаіл Гуцэрыеў упэўнены, што «высокі прафесіяналізм і глыбокія веды Віктара і яго каманды дапамогуць у ажыццяўленні нашых шматспадзеўных планаў». Да таго ж «тэхналогіі штучнага інтэлекту адкрываюць шэраг цікавых інвестыцыйных магчымасцяў».
Віктар Пракапеня раней рэалізаваў наступныя ІТ-праекты: інвестыцыі ў Viaden Media, лідара ў сферы распрацоўкі мабільных прыкладанняў, інвестыцыі ў exp (capital), кампанію ў сферы маркет-мэйкінг.
***
Сям'я Міхаіла Гуцэрыева (яе сябры — Саіта-Салам Гуцарыеў, Мікаіл Шишханов і Саід Гуцэрыеў) названая ў гэтым годзе Forbes найбагацейшым кланам ў сучаснай Расеі. Яе стан ацэнена ў 9,8 млрд даляраў, сам Міхаіл Гуцэрыеў у рэйтынгу расійскіх мільянераў займае 16-е месца з капіталам 5,9 млрд даляраў. Сфера бізнэс-інтарэсаў - фінансы, нерухомасць, здабыча карысных выкапняў, IT.
Упершыню аб інвестыцыях у беларускі IT-сектар Міхаіл Гуцэрыеў, якога звязваюць сяброўскія адносіны з Аляксандрам Лукашэнкам, заявіў у чэрвені падчас Пецярбургскага эканамічнага форуму. Ён не назваў кампаніі, у якія інвеставаў, адзначыў толькі, што адна займаецца фінансавымі аперацыямі. «Кампанія сур'ёзная, 160 чалавек, у нас там больш за 50%. Мы ўклаліся, там сядзяць геніяльныя хлопцы, якія ўжо зарабілі шмат грошай. Мы ўзмацнілі гэтую каманду беларусамі, украінцамі і расіянамі. Я думаю, гэтая каманда прынясе нам прыбытак. Мы верым у гэта, ўкладваем свае грошы. Калі ўсё атрымаецца, мы заробім, не - значыць, не наканавана », - адзначыў кіраўнік «Руснефці» у інтэрв'ю РБК.
