Былы прэзідэнт Ізраіля Мошэ Кацаў, асуджаны за згвалтаванне, выйдзе на волю датэрмінова, паведамляе ВВС.
Камісія па памілаваннях Упраўлення турмаў Ізраіля задаволіла прашэнне 71-гадовага палітыка аб датэрміновым вызваленні. Ён павінен пакінуць турму на наступным тыдні. Па словах адваката, пачуўшы гэтую навіну, Кацаў заплакаў. Ён адбыў пяць гадоў з сямі, прызначаных яму судом.
Гэта была ўжо трэцяя спроба Кацава дамагчыся датэрміновага вызвалення. Дзве папярэднія поспехам не ўвянчаліся.
У 2011 годзе Кацаў быў асуджаны акруговым судом Тэль-Авіва да сямі гадоў зняволення паводле абвінавачання ў двух выпадках згвалтавання сваёй падначаленай, сэксуальных дамаганнях, непрыстойных паводзінах і спробах перашкаджаць следству. Палітык настойваў на сваёй невінаватасці.